°~*¤®§(§ شبـــكة ويــلان العـربـيـه §)§®¤*~ˆ° - (من روائع سداح)من ليلة البارحة

- منتدى المختارات الشعريه (http://www.weelan.com/vb/forumdisplay.php?f=10)

- - (من روائع سداح)من ليلة البارحة (http://www.weelan.com/vb/showthread.php?t=20123)

(من روائع سداح)من ليلة البارحة

من ليلة البـارح وحابسنـي الضيـق

عسى صباح اليـوم يطلـق سراحـي

وعادت لي الضيقه على فكّـة الريـق

الله يهوّنـهـا ويسـعـد صبـاحـي

لا قمت أدرّجها على قـد مـا اطيـق

تغانمتنـي مـن جمـيـع النـواحـي

بينـي وبيـن الغرغـره والتشاهيـق

أرمـاش عيـن وجلسـةٍ وإنسداحـي

لاشـك يومـي عنـد رب المخالـيـق

اللـي بذكـره بهجتـي وإنشـراحـي

مانيـب وارث غاليـات الصنـاديـق

وخزايـن آل سعـود وآل الصباحـي!

أن عشت .. عشت مْعَ الرجال المطاليق

وأن مت .. موتي حق والعمر ماحـي

هبَّت هموم الصـدر جملـه وتفريـق

وأزريت أعرّضهـا هبـوب الرياحـي

ما عـذّب الشعّـار غيـر الطواريـق

كـلٍّ تعلّـق فـوق قـرن الوضاحـي

موثَّقـه مـاعـاد تحـتـاج توثـيـق

وانا قنعت وخاطـري مـا استراحـي

وشاح خملوقه .. علـى أم الخماليـق

اللـي تشوفونـه عليّـه وشـاحـي!

أغيب مـن فيـض المحبيّـن وافيـق

وآخـذ بـلا منّـه شهـادة نجـاحـي

والعولمـه تفتـح قـفـولٍ مغالـيـق

وهـذا زمـان الفـتـح والإنفتـاحـي

مـا جيتهـا ناكـر وملحـد وزنديـق

أعرف صلاح الدين وأعـرف صلاحـي

لكـنّ ياشاهـق بـروس الشواهـيـق

دحدر على ماجـاك وأسـرح وتاحـي

والحرّ لو يرضـى بحكـم المسابيـق

شاب ونبت له فـي جناحـه جناحـي

ويزيد غبنـه مـن فـروخ الغرانيـق

لا صنّفوهـا مـن طيـور الفـلاحـي

رميـت فـي وجـه اللئيـم المواثيـق

وطلبت من وجـه الكريـم السماحـي

ودوّنت فـي قسـم المجانيـن تعليـق

من يشتم المجنون.. ماهوب صاحي!!!

من يشتم المجنون .. ماهوب صاحي!!!