يابنت ياللي كل ذيبٍ نهشها= الذيب مايرجع على فضلت الذيب
شيلي بقايا جثتك في نعشها= لاحدٍ نعى موتك ولالك معازيب
بعض السوالف تفضح اللي فتشها= ومن هو يدق الباب يلقى له مجيب
الحب ماهو فرشةٍ نفترشها=ولاهو بكلماتٍ مع شمسنا تغيب
الحب عروق انفاسنا ينتعشها=ومن غيره الدنيا شتات وعذاريب
الحب نهر الشوق يروي عطشها=وفيض المشاعر بحر وامواجه تهيب
احساس ورد بصدق لونه فرشها=يربط علاقة ود مع ريحة الطيب
وانا عشقت من النوادر وحشها =شيهانةٍ تسكن براس المراقيب
واعشق مهار العز ماعشق كدشها=وعيني على العليا وعذب المشاريب
وتشوم نفسي عن خفايا غبشها=وانئى بها عن سكة الشوك والعيب
وذود الجرب عن ذودي اليوم حشها=مالك ترى في فيضة القلب ترحيب
وابعد مراحك لايقرب حوشها=هذي هي علومي وجوك المناديب
والا انت لحظة من لياليك عشها =بين الكرامة والنقى واترك الريب
هذي نصيحة من ضميري نقشها=على رصيفك واخر اعمارنا الشيب