صاحبي وقـف جـزاك الله خيـر = انزل وأذن نبـي نصلـي العصـر
لقضينا الفرض سو اللـي يصيـر = الصلاة ابدا علي مـن كـل امـر
خلنـا نرتـاح أتعبنـا المسـيـر = طََوَل المشـوار والسكـه وعـر
ودنا نجلس علـى جـال الغديـر = وانتمتـع بالربـيـع وبالـزهـر
ريحة القيصوم والشيـح العطيـر= تنعـش اقلـوبٍ توطاهـا الكـدر
خيمةٍ بالبـر مفروشـه حصيـر = تسوى عندي فلةٍ وسـط الخبـر
شب نارك دامنـا وقـت العصيـر = جهز الدلـه وقـرب لـي التمـر
اه من جرحٍ لجا باقصى الضميـر = مايطيـب الجـرح والدنيـا قهـر
والقهر لصـرت محتـاج لحقيـر = حاجتـك عنـده ولا عنهـا مفـر
وانت مضطرٍ ولا لك مـن مطيَـر= هـذه والله قاصـمـة الظـهـر
يتركـك تمشـي بخـطٍ مستديـر = لاقضـى الـلازم ولا قـدم عـذر
وان نخيته جاك مكسوفٍ حسيـر= وان بدا له غـرةٍ منـك غــدر
وانهزم عنـك مثـل زول البعيـر= مرخيٍ راسـه تقـل يتبـع اثـر
تزكـي الاحـرار لصـاح النذيـر = لنخيت الحـر جـا يهـدر هـدر
يرتكي للحمل لو حملـه عسيـر = مايمل الحمـل لـو حملـه كثـر
وان زبنته خايفٍ بـه مستجيـر = دون عمرك حـط مالـه والعمـر
وش يجيب السيف للموس الشطير = ذا لقص الراس وذا لقص الشعـر
لايغـرك منظـر العـود النظيـر = كل عـودٍ يرجـع اصلـه للبـذر
وان بدا لك لازمٍ لو هـو صغيـر= قبل اخذ الشور والعـزم استخـر
شف حبال الليف مع كثر الجرير = شق دربه في جـلاميد الصـخــر
ولا وصلت لقمة الـشي لاتسيـر = ماورى القمـه تـرى الا منحـدر
والعوافي نومـةٍ عقـب الاخيـر = فوق طعسٍ ناعـمٍ رملـه حمـر

هـــــــــذه والله قـــاصـــمـــة الـــظـــهــــر



انت مبدع مبدع وتكتب بفكر راقي وواعي فالله درك وتاكد انني من متابعين هذا الاسم والفكر المميز دوماً


تقبل تقديري وتواضع ردي امام هذا الشموخ

فأعتقد ان هناك خلل او انك نسيت كلمه من الشطر
فشاعر بجزالة احمد العريفي اعتقد انه لايصعب عليه الوزن

كلامي اخي لا يقلل من جمال ورعة وجزالة ابياتك
وهي وجهة نظر شخصيه لا اكثر