ابيات قلتها اثناء عرض حلقة شاعر المليون والتي كنت اتمنى ان اشارك بها وكان في هذه الحلقة قد اثار حفيظتي

ايضا الشاعر ياسر التويجري وانا في المقناص في باكستان وقد وجهتها الى سمو الشيخ محمد بن زايد آل نهيان في

ذلك الوقت وقلت فيها :

يا طويل العمــر لو عنـدك مجـــال=تقــرا هـــذا القـاف ولا تسمعــه
صح لكــل مقـام يا الغــالي مقــال=بس وين الوقـت حتى نبدعــــه
فأن حصل لك وقت ياذرب الفعــال=اسمع اللي شوفتك هي مطمعــه
واسمع اللي فاق تصويره الخيــال=يوم جســد ضحكتك من موقعــه
وشاف شاعر ما على شعره جدال=ياسر اللي شـايفــك واقف معــه
والله أني غابطه ولـــد الحـــــلال=يوم ربي مع سمـــوك يجمعـــه
اشهــد انه فاز يوم أعلن وقـــــال=طالبـــك بمصافحـــه بموادعــة
وذي مناة النفس ياذرب الخصـال=لحصلت لي خافقي وش يردعه
بس حظي يا طويل العمــر مــــال=يوم فكــري صــد قلبـي وامنعــه
ودار في ذهني من الصدمة سؤال=كيف ما حضر للعقول المبـدعـة
رغم إني بالشعــر عندي اختــزال=فيه من جزل المعــاني المقنعــة
لكـــن الأيـــام وظـــروف الليـــال=أبعــدتني عن غمـــار الموقعـــة
وحرت أنا مابين شعراً فيه مــال=وبين نفس ٍ بالقنــص متولعـــــه
واستخرت وقلت يا بن ادم تعـــال=كم ثمــن بعض الليـــال الممتعـة
لين جيت الروض ضاربه الشمــال=وطار سرب من القطـا من منقعه
فكم تسوى شوفتك خرب ٍ غفــال=ولا حفـــــان ٍ خريـــش مقلعـــه
وجا جواب اللي تبادر بألف بــال=كيف ابن صيــاح ما جــا نسمعه
وكنت أنا موجود في وادي ابهال=وأخويـانـا بخوة الشيخ أربعـــه
ويوم جينا من ورا ذيك الجبـــال=والدليـــــله ســـاير ٍ لــه قربعـــه
بو حمد آمر وقال امشوا عــــدال=وتل سبق الطير وأرخـا برقعــــه
وطارت الربدا وحن فينا أخبـــال=يوم طار الطير سرنـــا نتبعـــــه
ويوم حولهــا وفي ذيلــه طمـال=جيت أنا والشـيخ بنصـور معــه
ومن قنص وأدمن الى حد الثمـال=سكــرته مع رغبتـــه متجمعــــه
ومن يراني قال بي بعض الهبال=لين أهيجن والطيــــور مفرعـــه
ويا بوخالـــد مطلبي ماهو محال=والشعــر معنـــاه بأول مطلعــــــه
وللشعـــر والله ماعنـــدي مجـــال=رغـم إني ماخـــذه من منبعــــه
والتمـاس العــــذر لغياب الرجال=شي عــارف به وأنـــا متوقعـــه
بس أنا يا إخوان ما فيني احتمـال=اترك المقنـاص وأعــاف اسنعــه
وصاغهـا من قالها حسب المثــال=ضاقت الدنيـا وعند الله السـعـــه