يالله ياللي عالمٍ بالخوافي = ياللي عبادك في دجا الليل ناجوك
ياللي لعبدك مانت جافي ونافي = بابك لدعوات المخاليق مفكوك
يارب يا رازق وحوش الفيافي = يافارج الضيقه على كل مضنوك
يالواحد اللي للخلايق تعافي = طالبك يارب المقادير وارجوك
انك تجنبني طريق المهافي = وانك تجيب لدعوتي حين ما ادعوك
وانك تجنبني خطا كل هافي = وانك تخلي كل ما اقول مبروك
وانك تسهلي صعيب القوافي = وتلهمني الجزله على صفحة البوك
في مدح من هو بالجزيلات نافي = محمد سليل المجد للطيب مشبوك
نسل العواجي والخوافي نظافي = مثل الذهب علمه منقا ومسبوك
وافي يا ابو نواف بالحيل وافي = هذا وكادٍ ما يجي حوله شكوك
ذكرك مع الاجواد يا شيخ كافي = للجنه اللي للصعيبات ربوك
علمك يا ابو نواف ماهو بخافي = واضح ولجله ساير الناس حبوك
طيبك مع اهل العرف شامل وضافي = طيبك وراثة جد من ورثة ابوك
ومع طيب نفسك يابعيد المطافي = عزة رجل منها الرجاجيل هابوك
عز الله انك يامحمد سنافي = يمدحك من لاجاك واللي بعد جوك
يالوايلي معدنك طيب وصافي = سيرة حياتك ورد ما خالطه شوك
يالوايلي تفرح ليا جاك لافي = لانك من رجالٍ على الطيب حيوك
ويلان في عفه تعف وتعافي = ويلان دم معادي القوم مسفوك
والعلم يذكر والفعايل تشافي = وعلمك وفعلك للطويلات عدوك