السلام عليكم ورحمة الله وبركاته
أعتذر لكم أخوتي عن انقطاعي عن المنتدى،
وذلك بسبب تواجدي خارج الوطن،
ولكن عسى أن نكسب رضاكم في الحضور ليمحو الغياب الإجباري.

...............

قرأت كما قرأ الكثير ما نشر في الصحف حول انتقال اللاعب ياسر القحطاني لنادي العين الأماراتي
وما قام به أحد مشجعي العين بنحر عشر من الإبل لهذه المناسبة.

هذه الأبيات اعتذار لحرش العراقيب.

---------------


يالفطّر اللي دونكن راحت أرقاب
ومن دونكن ما طاع شاير بشوره

مصقّلات دونك تسَلْ وحراب
وكل الفعول الماضيات مخبوره

يوم الليالي كلّها عجف وصعاب
اللي خليٍّ منك يهتَزْ دوره

من شانكن يغزى على دار الأجناب
وكلٍّ على حماكن تقدّم بزوْرَه

يقدم على الحرب الضروسه ولا هاب
ومن دونكن يثني ويثبت حضوره

أما رجع كسبان وإلا بعد غاب
عن الأهل وإلا تجبّر كسوره

من يملكك كانّه حكم سيّد الغاب
وليا تكلّم تآخذ الناس شوره

زمالته وسناد بيته والأطناب
ويوم العجاف أنتي عشاه وفطوره

واليوم يوم أن الزمن للعرب طاب
والأرض صارت بالحياة معمورة

أهل الخليج أحيوا لك أحداث وأنساب
وفي كل عامٍ للمزايين دوْرَه

تدفع بك الأموال من عطر الأشناب
ما همهم زود الرصيد وحدوره

لكّن لا يزعجك لو خاب من خاب
اللي على الخيرات ما هي شكوره

أهل الريا من كثرها مالها حساب
اللي على لهو الحياة محصوره

واللي جرح نفسي ولا بفعلته طاب
اللي نحر عشر على شان كوره

ما هو كرم للضيف يا فاتح الباب
لو كان تعبير الخفوق وشعوره

وإن كانه إعجابٍ فيا قبح الإعجاب
والعقل له زوغه، وللدّم فوره

لكنْ ياحرش العراقيب ما صاب
رجالٍ أثبت غيبته في حضوره

والعاقل من الناس للي فعلْ عاب
للي نثر دمّك على شان كوره