لك حق تزعل بالمحبه واراضيك=ولي حق من بعد التراضي تراضي
ياللي سرقت القلب والقلب قاضيك=ومن بد خلق الله ناداك قاضي
لولا الغلا ما كان راجيت ماضيك=واهناك من سالف زمانك بماضي
اتعبني الهوجاس يسرح باراضيك=يلبس ثياب الخوف والقاع فاضي
من ضيقته روّح عن الخلق عاضيك=والله جزاه إياك بالخير عاضي
يا تاج راس الكل لا خاب حاضيك=ياللي على الهامات فيكم يغاضي
جمر الخطا ولّع سبايب تغاضيك=الصمت يقتل والعتب فيك ناضي
فان كان به زله فانالك اراضيك=القاف لجلك ساح عرقه وهاضي
وان كان به غلطه فلاني مقاضيك=إحكم وخافي النفس ماقيل خاضي
ولك حق تزعل وانكسر لك واراضيك=ولولا الغلا ماجيت مكسور راضي

الشاعر الراقي / جائز المليحان


صح الساانك مدد بلا عدد

وبيض الله وجهك على هذا النص الرائع
والغير مستغرب من شاعر جزل بحجم ابو احمد
تعجز الكلمات يالعشير ان تفيك حقك من الثناء والاطراء
فأنت شاعر راقي بأسلووبك ومفرداتك وجزل بأبياتك
وتجبر الجميع على متابعة مانزف على هذة الصفحات
لله درك يابو احمد
استمتعت بقرائتي لهذة الفاخره

تقبل فائق الود والمحبه

كن بخير