حمص العذية مالها وصف واجناس=عزي لربع من هواها مفاليس
ليا احتمى فريونكم تقل محماس=ذعذع هواها بارد له نسانيس
مصيفها يا كتمت حمر الاطعاس=يسوى مصيف اسكندرية وبلبيس
ووديانها بجبالها الخضر غطاس=تسوى مصيف الغرب لندن وباريس
ريحة عبير اشجارها تقعد الراس=ليا مال ذعذاع الهوا بالعرانيس
وجميع طير تسمعه وقت الادماس=توحيه فوق غصونها له نجاريس
بغاباتها تشوف من كل الاجناس=طير الخضاري والحجل والطواويس
ليا اقفى خضار الزرع واقبل للايباس=وعاشور هل ويبس الزرع تيبيس
تنسمت شرقية تقلب الراس=نسم هواها مثل صلو المحاميس
جونا فرار دبي وعمان نساس=فرارهم مثل فرار المحابيس
مقفين حامسهم من القيظ حماس=جونا لذعذاع الشمالي عواسيس

قومي , خطاك السو يا حمص , لا باس=يا جعلها تمحيص عن كل تدنيس
ينصرك رب الناس لا باروا الناس=ومن يستعين الله يبي يخزي ابليس
يا ( حمص خالد ) ما رضيتي بالادناس=يا منجبة روس الرجال الاشاويس
ما تركعين الا لخلاق الانفاس=يا الشامخة راسك مدى العمر ما ديس
تبقى بعزك فوق ماتطيح يا راس=شامخ ولو كثرت عليك الهواجيس
( بالخالدية ) طاحت اصنام الارجاس=و بيرق ( ببابا عمرو ) ماجاه تنكيس
بحرك تغرق غبته كل غطاس=وروحوا بحسرة ياالوجيه المناحيس
ما همك البارود وجنود الافلاس=مفلس ويرجي عزته من مفاليس
صخرة عزومك بالمقاييس ما تقاس=وعزي لقرنك من عنا النطح يا تيس
عميل ومنافق ونجس من انجاس=ومبطي عروقه كلبوهم جواسيس
ما من فرج ربي ولا رحمته ياس=ويزيل عرشه من هدم عرش بلقيس
يا أمة الاسلام هالوضع حساس=وشلون نشبع نوم وسط الكوابيس
اصحوا قبل لا ياقع الفاس بالراس=الفرس جوكم جايعين ومضاريس
يا حمص : صبراً والله ارحم من الناس=يا حمص : هذا الجمر عربون تأسيس
انتي ذهب صافي ولا انتي من نحاس=وشلون تشره في ذهبك النحاحيس ؟
باكر تزين وترجع ايامك اعراس=ونقول ماقاله لنا ( حادي العيس ):
( حمص العذية مالها وصف واجناس=عزي لربع من هواها مفاليس )