ياالله طلبتك ياولي وانت حلال=يافارظن بالكون خمس الصلوات
تفرج لعبدن يسألك وانت تنسال=دايم عطياتك كبار وجزيلات
لك اشتكي يارب من ضيم الاحوال=وقت به الحسنه تبدل بسيات
غلطة خويي شلتها وقفت رجال=مع الخوي اقيف طبعن وعادات
صارت عليه قصتن تشغل البال=فيها تحولنا لقسم الجنايات
منها تعبنا بين الاقفا والاقبال=مابين سين وجيم عبيت صفحات
لأجل الخوي ماتلحقه بعض الاثقال=بديار غربه شلتنها عنه بسكات
يوم شفت دمعه ينتثر تقل همال=حطيت روحي دون روحه بنكبات
يقول دون امي مسافاتن طوال=وانا بدار اجناب وابوي شمات
قلت آه انا شيالها مابها جدال=عن الخوي ارفع حمولن ثقيلات
فيها ندور حل يمين وشمال=نص الخطر باقي ونصن منه فات
انصا رجالن كنها زامي الجال=الي ثبتو مثل جبال السروات
ماهزهن ريح وصواعق وزلزال=بقين كما الدوشان بالوزن واثبات
واخص نايف منهم نسل الابطال=هو اخو جوازا ينعبي للمهمات
صميدعي حلال نقاض فتال=ابن الشيوخ الي تحوش الجمالات
ابغاك سيفن في يميني وقتال=بك اعدي وابدي حدودك صقيلات
وابغاك ليه درع ولسان قوال=وابغاك ليه وجه حشمه وشيمات
ياعز من جاهم عليه الدهر مال=قليل مال وطاح في وسط نشبات
مطلوب خمس ارقاب للعم والخال=وهو وحيد امه ولا له جماعات
قام يتذكر يوم خبث له الفال =بالي لهم في حزت الضيق وقفات
تذكر الدوشان ماضين الافعال=شيوخ جمع مطير اهل المثارات
الي لهم في قمت المجد منزال=من دور فيصل صانع المستحيلات
شيوخن بهم عن قاسي الضيم مدخال=بيومن تساوا في الاحيا والاموات
لانشفت الارياق والسيف شغال=تظهر عزوم اهل العزوم القويات
بالمعركه والدم سابح وشلال=تطول فيها اشناب وشناب هيهات
والي ستر عاره وكاسب من المال=بالمعركه ياخذ مع القوم جولات
خواله الصاطين في كل الاحوال=يعنا لهم لصار هده ومدات
وخاله تعده عن ثمانين خيال=ماحركن قلبه سريعات الاصوات
وسلالته نايف الى الأن مازال=له ينعنا عند الامور الصعيبات
الذيب بالقليب مافيه ميال=والحبل متلوي وفيه انعقادات
من طاح وسط البير ماجاه نشال=يغرق بجم البير بخلال ساعات
والسر مايفشا على كل رجال=والحمل ماحمل على جمال هزلات
حيص الجمال يثور بالحمل وعقال=لو كان حطو فوق حمله وساقات
والنور نورن بالدجى ماهو هلال=يجلي عن الساري مع الليل ضلمات
وانا جعلتك نور ليه بالحال= ابغاك تنهي قصيتي والعقوبات
والعذر يرفض وانت طيب وبذال=ولايحاش طيبن بالعذار السمينات
والرجل لويموت عقب له عيال=تبقى معاهم سمعته طول الاوقات
والطيب يسعى للنواقص بالاكمال=لشين يجي دايم يحسب حسابات
وصلو على الي خصه الله بالانفال=الي نشر بالارض دين السموات