ما تقولون لي وش سالفة أمكم يالبنات ؟
][ المدخل و المقدمة و الموضوع و إذا يمديكم مروا على ما يستفاد قبل يأذن ][ إن الناظر و المتأمل في حال أسواقنا اليوم <--أقول اهرجي زين حوم تسبدتس .. من جد وش سالفة كثرة بزران الثانوي بالراشد ؟ .. و هل له علاقة بـ كثرة اللبنانيين بالفيصلية .. و لماذا و كيف و احتمال ؟... طيب طيب أبعض لي على شحمة بس لاحد يدف :D . ع طاري الدف .. انهبلن البنات و قعدن ! مير منول بلعنا سالفة المكياج و العطر بالسوق و المطاعم ! .. الحين تطورت الدعوى و صارت بليـّا حجاب خير شر ! .. عبايات مفتوحه مع الجنبين و الجنز مغموت طالعتن روحه .. لو داري إنه يب يصير لهن بنطلون .. تسان صار شنطه بكله .. [ أي حاقه فـ أي حتـّه ] :D لا من جد وين قاعدين ؟؟؟ .. قسم بالله فيه ناس أرحمهن و ربي ! .. يا قروية توه تطيح بالعبايات و الأسواق و تو أمها تسمح لها بالمكياج .. يا وحده توهم يجيبون سواق .. يا وحدتن لا بستن كل عفش البيت .. وش دعوه كل ذا فرحانتن بالشتاء <-- طراه وحده بالسوق لابستن عباة و فوقه بالطو و فاغصتن رجيلاته في بووت و فوقهم شال .. اللي يسمعه يقول عجزنا لا نتحرك من كثر الثلوج .. زين اللي ما تحمست وجابت ألواح تزلج :D . ع طاري الثلوج .. كنت رايحه السوق أمس أبي أتسوق و أشتري لي أشياء (باللهي) .. و في حدى المحلات كان فيه ثنتين وراي .. وحده منهم مطنقره .. و الثاني ايقال انها جالستن اتراضيها و طلعتها للسوق .. من باب تغيير الجو و فش الخلئ .. المهم إن هاللي مطنقره تقول : لا لا لا و الله انتس كنتي متعمده إنتس تفشليني عند مها مدري منى (منيب متأكده لأني ألصق بهم همن لا عطتني نظره خفت و هجيت):D .. و ذيك تحلف و تقسم إنها ما كانت تقصد شي .. بس إنها كانت تسولف معها من باب انها تمون و مدري وشو .. طبعا أنا جذبتني السالفه ما يحتاج أقول إني طردي وراهم من محل لمحل شوي و أصف معهن و أعطيهن رأيي .. يوم صدز حامت تسبدي صار لي مده و هن على نفس الموال .. لا و المنطقره تشوهق من الصياح .. مير أول مره تصادف معي أشوف وحده تتسوّق و هي حاطتن شادو أزرق و تصيح :D . ع طاري أزرق .. وحده من أهلنا ماغير تشرب لبن و تاكل زبادي ليل نهار .. باقي لها خمس أيام تقريبا و تقلب بقره .. كانت راجعه من السوق للبيت و مير تذكرت إنها لازم تشتري لبن .. عاد هي من زمان طاقن في بالها تجرب زبادي (اكتيفيا) .. و روحي مري على البقاله .. و بأعلى صوت تنادي السعودي اللي هناك : لو سمحت .. عندك زبادي (اكتفينــا) :D .. اكتفينا من إيه يا حسرتي ..عليتس و على اللي خلانا قرايب الله يفشلتس . ع طاري الفشيلة .. طالعه مع أمي لمحل ساعات .. جلسنا ندور و نتأمل بالساعات .. و الموظف ما غير طردي ورانا اندقّت رجيلاته مسيكين .. الحصيلة اللي طلعنا به كانت خمس ساعات .. طبعا نب نختار وحده منهن محناب شارينهن كلهن (قل أعوذ برب الفلق) .. وقت ما كنا نختار من بينهن .. كان جنبنا وحده مع زوجها .. إذا شفتيهم تقولين وش جايبهم ذولا للمحل يكسرون الخاطر .. شوي ولاّ يقول لها الموظف .. هذي الساعة بـ 24 .. و ذي بـ 20 .. قالت أوكي ارفعهم لي وعطني ذيك الساعه بعد .. لا و رجلها جالسن يتنقوى ما بعد يقضون أبشركم .. قلت لأمي انتي تسمعين اللي أسمعه .. قالت إيه .. ما ينخاف إلاّ من هالأشكال .. إلا ماودتس نقرب نشوف وش هي ماخذه .. ؟ <-- عيب عليتس يمه خخخخ المشكلة إن هالحرمه ساعتها القديمة تهببببل وش زينها .. يا ناس عندكم فلوس غبّوهن وشوله هالصرفيات أبفهم (ليـــن الورد وش أخبار الساعة .. يقولون قايم عز المغاط ؟؟):D . . ع طاري المغاط .. ما يستفاد من الخنبقة أعلاه : 1- لا تحقرون القراوة ترى يطلع منهم 2- اللي طاقتن بابهم أم العبيد يا ليت لو توكّد قبل تصيح إن الماسكارا ووتر برووف<-- يااي:D 3- إذا شفتي وحده مطنقره .. يا إنتس تلقطين السالفه زين .. ولاّ كملي شغلتس تراه مضيعة وقت و تعب و جهدن على الركب و اسأليني أنا 4- لا تعرسون إلا على لبنانيين تراهم طخوم<-------------- ياويلتس هذا أسمه تحريض قضى قرقي .. لا حرمكم الله خشتي قولوا آمين :D ,, هذرت / شمـــــــــوخ |
رد: ما تقولون لي وش سالفة أمكم يالبنات ؟
ياحبي لك ياشموخ انتي وهذرتك
بس مره ثانيه كبري الخط وعلى طاري الاسواق بالله مايرفع ضغطك الشوام اللي بالفصيليه وصحارى وبالرياض عموما سياراتهم فخمه ولبسهم ماركات وكله من خيرنا واللي قهرني من جد مره انا وصديقتي كنا بصحارى دخلنا بمحل الكاشير لبناني والثاني سعودي يشتغل بالمحل المهم فجاءه الا واللبناني يهزئ السعودي لانه قال لوحده من الزباين مافيه المقاس اللي تبغينه وهو موجود بالمستودع بس السعودي ماانتبه له تخيلي اللبناني يقول اذا ماعجبك الشغل ورنا عرض اكتافك فيه الف واحد يتمنى مكانك والله رحمت السعودي والله انقهرت شوي اصيح صديقتي تقول انتي وطنيه بزياده لاتعرفينه ولايعرفك امشي بس يووووه ياكثر المواقف اللي تقهر بس خليها على الله يعني البيت بيت ابونا وجو الغرب وطردونا وبالنسبه للحجاب صايرين البنات مايتغطون كلش والله انصدمت لما شفتهم بجامعة عليشه الظاهر بس انا وصديقتي عبايتنا على الراس وليتها تجي عالعبايه الا يطلعن بدون غطاء اول يتغطون غطاء خفيف الحين بدون والله يستر بعدين زي ماقالو تدرج للتبرج لاعدمنا هذرتك يالغاليه باي باي |
رد: ما تقولون لي وش سالفة أمكم يالبنات ؟
شمـــوخ ..
يالغاليه والله الموضوع باين عليه يهبل .. بس تكفين كبري الخط ترى اعيوني يالله بالخير ^___^ سلااااااام .. راجعه لج بعد ماتكبرين الخط .. تحيتي لج / مشاعر حالمه .. |
رد: ما تقولون لي وش سالفة أمكم يالبنات ؟
هلا ليووونه
ياختي علامها عيوونكم خوذي مجهر وأنت تقرين تسذا زوين خطي مانب مغيرته <<< عنيده :D على طاري اللبنانيين ترا ماهنا أكشخ منهم عندنا بالريااض سيارات وشركات حاطينهم بالواجهه والفيصليه كلها محتلينها :D والمطاعم مدري وش خلو لنا << سوق حجاب وطقته :D تسلمين ياعسل على الحضور . مشكوره |
رد: ما تقولون لي وش سالفة أمكم يالبنات ؟
مشاعر هلا بتس
منوره حواء كلهااا يادوباااا مادريتي شكلي ماعلمتس صادووه حقتس نزلته روحي شوفيه هناك:D مشاعر جعلتس ماتعرسين غير مرة وحده :D وشفيه خطي تراه نفس خطتس مير لايكثر وتعالي أقري وعطيني رايتس تراه مهم :) ولاتطولين بالخطمات يمين ويسار وتنسين موضووعي عنبووهن هالبنات هذا وأنا مسوين أعلان بتوقيعي كبر قريح :D ومحد مر عليه . أنتظرتس يابت |
رد: ما تقولون لي وش سالفة أمكم يالبنات ؟
شموووووخ اوولا شكرا على الموضوع اللي عجزت اقراه
الله يرحم وااالديك كبري الخط لاصق بالشاشه من اليوم ولبست نظارتين ومافيه فايده وع طاري الفايده كبري الخط وناخذها من موضوعتس وع طاري موضوعك اتوقع انه رهيب من قريت السووق وعباايه ومدري وشو لا حلو الموضوع بس يبيله خط كبير شكراا اختي شموووخ اخوك :عبدالعزيز الرميزان |
رد: ما تقولون لي وش سالفة أمكم يالبنات ؟
ياحبي لقرقتس وهذرتس
بس سؤال يسدح نفسه الهيئة ماتدخل المجمعات والمراكز الكبيره ؟؟ شكراً لكــ شموخ |
| الساعة الآن (10:01 AM) |
Powered by vBulletin® Version 3.8.7
Copyright ©2000 - 2025, Jelsoft Enterprises Ltd
شركة استضافة:
استضافة
رواد التطوير
مايكتب في هذا المنتدى لايعبر بالضروره عن وجهة نظر ادارة الموقع وانما يعبر عن وجهة نظر كاتبه