يارب تغفر ذنوبي يارب تدمح خطاي = لصرت بالقبر وحدي ولاحدن لحالي يشوف
أواه لراحوا الخلان واقبل مساي = وهالني منكر ولاغير ربي يروف
الجواب يتحقق من منابع حشاي = ماهو كلاماً على لساني يجول ويطوف
يالله دخيلك رجيتك لاتخيب رجاي = مالي سوا رحمتك لطال يوم الوقوف
زادي قليلً ودربي فيه يكثر عناي = واحمل ذنوبي ومعاها وهم التمني وسوف
واليوم انت الملاذ ورحمتك هي عزاي = رفعت اكفي ولك ماخاب رفع الكفوف
ابغى الجنان وبها غاية مرامي وهناي = قصور وانهار واغصان دنت للقطوف
وحورية لاسقتني بالكاس يفنى ضماي = في خدها اشوف خدي يابهجتي ويش اشوف
تزداد حسن وجمال بكل لحظة معاي = في منعمً سرمدي ماعنه صد وعزوف
اريج ومروج وحور وانهار تجري وراي = وخيام لولو تلالا قدام عيني صفوف
واخير من هذا كله هو نهاية مناي = نظره لوجه ربً وهاب معطي رؤوف
يارب وانت اللي قادر وهذا هو مبتغاي = يامجيب الدعاء من قبل نطق الحروف