لو الشعر يغني فقير ٍ ومسكين=تلقى رصيدي داخل البنك مليار
يشوم كنه من كبار السلاطين=ومداه فوق طويق ومن فوق سنجار
شوارد المعنى سمان المضامين=جزل البيوت الي تغذيها الافكار
قنصتها قنص الحرار الشياهين=وهي تسلب الالباب وتشد الانظار
البارحه والنوم وينه وانا وين=شد الرّحال وطوّلت فيه الاسفار
كني لك الله ساهر ٍ حول عامين=وفي مسرح الدنيا تتبعت الادوار
افرح على فرقا الوجيه الملاعين=واحزن على فرقا سديدين الاشوار
يا راكب الي موديلها سبع والفين=لاهي بلا كدلك ولاهي تون كار
( بي ام ) سمّوها ونعم ٍ ونعمين=ماكنها الا وايل فيوم ذي قار
منوة هل الايجار والقسط والدين=الي عليهم سقف الايام منهار
مركوب للي ان سولفوا بالملايين=تشبه سوالفنا عن اثمان واعشار
ان شفتها رتّل عليها بجزأين=وزوّد صلاه على النبي خير الاخيار
ان جيت مقدمها ملت منّك العين=جحافل امريكا على جهاد الانبار
والا فريق ٍ مكتسي بالنياشين= قدم الملك ثابت ولاهو بمحتار
وان بدلّت فالترس من ون لاثنين=هدة وحش ما حافته كف صقّار
وسرعتها لا وصلت على حد ميتين=مع الشبح ما جابها رصد رادار
وان لفلفت فالخط ليسار ويمين=ردوف شقرا تهزها طقة الطار
صقعة مكيفها مثل ثلج برلين=ماباقي الا تنهمر منه الامطار
وانوارها ان روّح من الليل ثلثين=نجم ٍ سناه يشع في كل الاقطار
قوة محركها فحول البعارين=يحمي مفاليها طويلين الاعمار
واليا ركبها طاوي الهم والبين=يسكر ولاهو يعرف الكاس والبار
يا عنك صانعها عتاة الشياطين=والا مهندس بعدها راجع شهار
اشلع بها لدار ٍ تضم المحبين=دار ٍ ولاهي هاويه غيرها دار
هي قصرها فالوسط مابين قصرين=مبني على احدث ما ابتكر فن الاعمار
علمّها فدموعي عطايا الكريمين=والخد شايب كاسر ٍ ظهره صغار
تبكي غياب الطاهر الكامل الزين=احلا حلا منها تذوّقت الامرار
بنت الرجال الي تضد المعادين=الي لهم هيبه وعزه ومقدار
قلبي مدينه والضلوع الميادين=ما احد ٍ مخاشرها ولاجاورت جار
واني اتوجد وصلها حين في حين=وجود الاعمى لا فقد حس الابصار
واني الا منه غدا الليل نصفين=اذب صوتي باسمها وقت الاسحار
اسم ٍ وهو عنوان كل العناوين=اروح وارجع له ولاني بمختار