لا ما رجيتك لو غدا ليلي مخيف = المقفي ان قفّى .. حشا ما اجيله

مات الحكي وتبعثر الصدق بالزيف = حيل الله اقوى يا الليال الطويله
كلن على راسي وقف في يده سيف! = كلن يبي يقتص بايّة وسيله؟
احدن كتب له (فلم) حبكة وتأليف = وحكاية ٍ من الف ليله وليله
وأضاف لحكايَته (فصلين) تحريف = شوّه بها كل الفصول الجميله
وأسقط من القصة فصول وتعاريف = واركى على غيره حمول ٍ ثقيله
أصل الحكي كله [ معازيب مع ضيف ] = والضيف قفى والردا في شليله؟
قابل معازيبه بطيب ٍ وتشريف = وهم احتفوا به بالنقا والفضيله
واقفى يتمتم في ردي السواليف = يطعن معازيبه وحاز الرذيله
ماني باقول شلون..؟ او ليه..؟ او كيف؟ = باقول بس المستمع عزتيله !!
وإلا انت ياللي كنت لي نشوة الكيف = جيتك عليله ورحت منك عليله
بدا النهار أحباب عشق .. ومواليف = وخيّم ظلام الليل وحدي قتيله
اقبلت تضحك لي .. وخليتني معيف؟ = وصارت محبتنا شبه مستحيله؟
صحيح احبك مير كثر التكاليف = زادت .. وانا مالي على القلب حيله
لا ما رجيتك لو غدا ليلي مخيف = المقفي ان قفّى .. حشا ما اجيله
ليل الشتا من صدمتي انقلب صيف = والحظ مال وزاد بالقلب ميله
لانته بكامل في جميع التواصيف = حتى تولع لي براس الفتيله؟؟
مع انه البارح لفا خاطري (طيف) = زولك تهيّا .. في دقايق قليله
ولنّي ماحب اكون في موقف ضعيف = صديت عن طيفك وصرت البخيله
لك مني ارحل وانت خل الملاقيف = يحكون لك عن كل ميله وعيله!
وان جيت يمّك/لك ذل وتحاسيف = نذر ٍ علي لاقص كل الجديله

الظروف لـ سود الايام تتحلوا = تشتهي في كل لحظة تمتحني
تنتقي من بين هالغالين نقوى= من حبيب أو أخ أو (طفل ) احتضني!!
وتتفاوت بين جرح وبين بلوى = أو مرض ولا حبيبٍ لي طعني
لين صارت لي دموع العين سلوى=وصرت أراعي هالدموع اللي رعني
وان نشدتوني ضلوعي ويش تحوى=باسرد المكنون في حرص وتأني
صح انا مو أم .. لكن آتشهوى=طفلٍ أعطيه العواطف بالتبني
فطرة الله خصّها في بنت حوى = (الامومة) حلم الاثنى والتمني
وقدّر الله في حياتي طفل يسوى = بالغلا روحي وغيره ما شحني
وصار حبه يرتفع بي ويتعلوى= وانشدوا قلبه عن احساسي وعني؟
لين شفته شوف عينَيْ يتلوى=وارجي آمال الشفا.. مير سفهني!
صرت اشوفه والمرض سوى وسوى=لولا ايماني بربي.. كنت اجني!
وبسبب ضيقه رفعت ألفين شكوى =وشلت لي موال حزنٍ فيه اغني
من سمعني قال طربانة وتهوى = ومن نشدني أبسم له (يعنني) !!
ولا انا من كف الأيام أتقهوى=من فناجيل الألم ياما روني
أجرع الامرار لين النفس تروى=وأشرب دلال القهر ظلم وتجني
اذكر اني في حياتي ما اتهقوى=هقوةٍ وتزين لي ويزين ظني!
أطرق أبواب الأمل من دون جدوى=و(الأمل) يصبح (ألم) فيني ومني
ويش أسوي دام بي جرح يتطوى = جا يدوّر له سكن فيني.. كأني..
صرت للحرمان ملجا.. بيت .. مأوى =وصرت اهلّي بالجروح اللي لفني
بالطواريق أتوسل واتعزوى= القوافي حيلتي والهم فني!
اختلافي والفرح يكبر ويقوى=كاختلاف المذهب الشيعي بـ سني
صاحبي.. ركز معي ياطير شلوى=كان تسمع شورتي (ابعد) لأني..
من كثر طعم الحزن أشعر بنشوى=واشعر ان الهم بالقلب متهني!
يمكن ان الهم فيني فيه (عدوى)=تنتقل لك من عذابٍ بي سكني!!
يعني افهم .. ما ابي لك زود عنوى= واترك دروبٍ بها جمرٍ يكني
ياهمومي.. كن حالي صار أشوى؟=وينك ابطيتي .. عليك القلب حني!!