ياعلي خل العيـد لأم الدناديـش=اللي تنظف كل يومـن جسدهـا
تبغي تماري ناقضات العكاريش=في كل ملفـاح تنقـض جعدهـا
العيد عيد الله ولو فـات حتيـش=من حسبة ايامن يمـرك عددهـا
نبي نعلمك المساري على الجيش=تمشي ذلولك لين يفتـر جهدهـا
خابرك منت بضاري للمطارييش=نبيك تونس حلوها مـن نكدهـا
ليله على مسرى وليله مغابيـش=وليله نخلي نومها لمـن رقدهـا
وليله على تمره وليله على عيش=وليله نوكلك اللحم صيـد يدهـا
ياعلي لاجيت العرب لاتجي تيش=خبل ليا جاب السوالف سردهـا
احفظ لسانك لايجي فيه تبطيـش=تصبح عيونك كايـدات رمدهـا
يجيك من ينشدك نشـدة كديـش=يبـي يسنـع هرجـة يعتمدهـا
خله يقوم مفلت في يـده ريـش=يروح منك وحاجتـه ماوجدهـا
ترى دعابيل الخبـول الفوانيـش=تبدي بما فيها ولا احـد نشدهـا
يجيك واحـد يـورش يوريـش=سحابته يسبـق مطرهـا بردهـا
واللي لغقمات السوالف مناقيـش=قراية الكلمه علـى اول عددهـا
تجي سوالفهم ضحـك وتهبيـش=وقلوبهـم محـد يفكـك عقدهـا