مشاعر فتاة
لكل شخص منا لحظة يحس بحاجته الماسه لمن يسمعه دون نقاش او عتاب وهذه حاجه نفسيه نحتاجها جميعا احيانا نجد من يتفهم هذه الحاجه ويبدا بسماعك دون أي اعتراض مهما جانب حديثك الصواب هو فهم ما تريد فبدا بسماعك وهناك من لا يتفهم ويبدا بالنقاش او النصيحه وهنا قد تضيق به ذرعا ولا تكمل حديثك!! وتنصرف عنه:sm116:
الادباء والشعراء الذين لا يجدون من يستمع لهم يبداون بكتابة ما يجول بخاطرهم فيبدعون بالشعر او النثر وبنفس الوقت يتخلصون من المشاعر المكبوتة لديهم بطريقة ايجابيه رائعه احيانا تجد نفسك مجبر ان تكون مستمع لاحد الاصدقاء وهذا ما حدث لي عند جاءت صديقتي المقربه لي جدا وبدات بالانفجار (اقصد بالكلام) والشكوى منذ ان بدات تتكلم فهمت انها تبيني اسمعها فقط <<<<<<<< تفهمها وهي طايره وطبعا سميت كلامها انفجار وغليان:sm266: لانه مشتت مبعثر تخرج من موضوع وتدخل بموضع مختلف فصار كلامها يناقض اوله اخره (ودي اضحك بس احتراما لانفعالها ومشاعرها اضغط على نفسي ) اول ما بدت تتكلم قالت بصراحه الاهل احيانا ما يفهمون بناتهم ؟وبدون ما اسال ليش وش فيه ؟بادرتني: الوحده من اول ما تنخطب يتخلون عنا (ودي اسال كيف )لكنها تبادرني بالكلام فهي من شدة الضغط بداخلها تتكلم بدرجه اسرع من سرعة الضوء :lightbulb: فاكتفيت بالتعبير بالنظر لها فقط دون كلام وكملت كلامها وقالت تذكرين ايام حفلات الزواج نبدا نترزز ونسوي انا مؤدبات وخلوقات وهاديات الطباع :more8: وخصوصا عند اللي عندها عيال او اخوان ( هنا ضحكت بشده بصراحه ما قدرت امسك نفسي ):sm19: وكل هذا كان والله استهبال ولعب لكن اذا جا الجد تتغير الحال تصدقين من كثر التفكير يطلع الفجر وانا ما نمت وهنا سالتها وش السالفه شو ي شوي بس علشان افهم .قالت انتي تعرفين ان كل بنت تبدا تنخطب من بداية المرحله الثانويه او قبلها بشوي لكن كل هذا يكون كلام لاني اساسا ما افكر بالزواج لين وصلت الكليه وبدا الكلام يصير جد يحتاج للتفكير. بصراحه اول ما يقولون لي فلان تقدم لك افرح وابتسم خصوصا اذا كان فلان من اللي يشار لهم بالبنان بمجتمعنا قلت :حلو وبعدين لكن اذا صار الموضوع من جد وطلبو رايي احتار !!!!!!طيب ليش ؟ لان هذا مستقبلي وقرار حياتي واخاف من الفشل !! يمكن نستحمل الفشل بالدراسه والفشل بالحصول على وظيفه لكن الفشل بالزواج صعب !! علشان كذا لازم افكر واختار الشخص اللي يناسبني وانا ادري ان التوفيق من الله سبحانه وتعالى لكن الخوف من الفشل في الزواج يلازمني والمصيبه انه ما تتوفر عندي المعلومات الكافيه عن الخاطب واذا حاولت اسال ابوي او اخوي يقولون عادي رجال والنعم !! فكري ولا تطولين علينا ترى الرجال مستعجل !!!شلون افكر بشخص ما اعرفه!!! وش افكر فيه!! احيانا اسال عنه اخوي اللي بخامس تخيلي الى وين وصلت علشان كذا اقولك الاهل ما يفهمون بناتهم قلت لها ليش ما تشوفينه وتتكلمين معاه بوجود الاهل؟ قالت اذا شفته او تكلمت معاه يعني هذي خطوه اولى للموافقه والشكل ماهو من اساسي عندي .طيب اخلاقه اكيد اهلك سالين عليه ومفصفصين حياته والا ما وافقو عليه قالت صحيح وانا مطمئنه من ناحية اخلاقه العامه لكن هل هو عصبي او هادي وشي طريقة تعامله مع الناس يعني اقصد صفاته الاخلاقيه الدقيقه وش يحب وش يكره شلون يفكر بالامور عنده حسن ظن بالناس والا يشك حتى بنفسه عنده مروءه وشهامه والا بليد الاحساس صادق بحديثه والا مرواغ واضح والا غامض بخيل والا كريم :confused: كل هذي الصفات انا مدري عنها اخاف انصدم بعد الزواج بصفه ما احبها ويكون الفشل مصيري فهمتي وش اقصد!! في ليله من الليالي جلست افكر وما في نموذج سيء للزواج داخل العائله ا و قريت عنه الا ومر على بالي وبديت ابكي اخاف اصير مثل فلانه اللي تطلقت بعد شهر او فلانه اللي تزوج زوجها عليه بعد سنه من زواجها او فلانه ................. او .........او وشكل صوتي وانا ابكي بدا يرتفع وانا ما ني حاسه بنفسي لين تجمع بعض افراد العائله حولي !!!! ويسالون وش فيه ما تبينه خلاص قولي ما ابيه !!! والمصيبه الثانيه انه الصبح كان عندي اختبار شهري تصدقين اخذت اربعه من عشرين بالاختبار هههههههههههههههههههههه (كل هذا من التفكير بعريس الغفله) :more28: واسالتني وش الحل ؟ قلت لها صارحي امك او اخوك بكل هالكلام اللي قلتيه لي وان شاء الله يساعدونك. يااااااااااااااااااااااااااااااااااااااااااا الله كل هذا يصير للبنت وينقص وزنها ويشحب لونها وحالتها النفسيه تتدهور ؟ ومحد حاس فيها !!!!!!اماا الشاب ما جاب خبر احد (معليش هذا رايي الشخصي ) وانا والله ما ادري وشي مشاعركم عند الخطبه ؟؟؟!!!!:more23: اخيرا اتمنى للجميع التوفيق والسعاده :more61: محبتكم ريمـــــــــــــــــــــــــــاا |
رد: مشاعر فتاة
ياحوبيلس ريمو انتي ومواضيعتس الحساسه
مع احترامي بس صديقتك هذي ماعندهاقدره على حسم الامور الواضح ان الأصل التردد في شخصيتها مو بس هاذا الموضوع ولا الحين كل هالناس اللي تزوجو وتوفقو وامورهم ماشيه كانو عارفين كل شي عن بعض قبل الزواج اهم شي الأخلاق العامه وسيد الخلق يقول اذا جاءكم من ترضون دينه وخلقه فزوجوه ماقال جيبو مكرسكوب وتفحصوه الدين والخلق صفتان عامتان مستحيل اي احد يتصنعهم والباقي امره هين يعني شفيها لو صار عصبي شوي حرام العصبي يعني يتزوج يمكن رغم عصبيته يكون حنون وهنا الحكمه لأن البنت تبي كل شي كامل مع ان فيه عيوب عادي ماتأثر وفيه شي يروح مع الوقت وفيه حاجات يحليها الحب والتفاهم بالتوفيق ريما انتي وخويتك وجميع بناتنا نسخه الى شموخه مع التحيه اسحبي ريما وموضوعها لمنتدى حواء لايقرونها الشباب يعرفون انهم مهمين وماخذين الجزء الاكبر والنصيب الاوفر من التفكير عيووف |
رد: مشاعر فتاة
العيوووف
يا ختي الحبيبه اشكر لك مرورك وتعليقك الرائع بكتب موضوع عن الرجال بس ممنوع تشوفينه علشان ما يكبر راسك عليهم ويدعون علي ريمـــــــــــــــــــــــاا |
رد: مشاعر فتاة
حياك ربي أخت : ريما
أول شي أهنيك على مواضيعكـ ... :D بعدين سلمي لي على صقيقتك المشتته وقولي نويدر يسلم عليك ويقوول أتزوجك انا بس بشرط تخففين من متابعه التلفزيون .. ههههههههههههههههههههههههههه@ ريما بخصوص البنت ( صديقتك ) ردت عليك الغاليه : العيوف لكن تعالي ... اماا الشاب ما جاب خبر احد أنا ما ودي أدخل بمخارج خريص لكن ...! صدقيني الشاب له نقص وزن وتتغير لون بشرته يعني مثل ما يصير للبنت يصير له .. هو بيعيش مستقبل .. يمكن يأخذ له وحده شيطانه ما يقدر يربيها .. أعذريني أخذت المخرج لكن بديور الحين .. وأمسك طريقي :D بيني وبينكـ أمر عادي الي صار مع صقيقتكـ لكن مقدمتكـ جميله جدآآآآآ طيب البنت هذي لا فكرت بالفشل والخوف من الآن ما راح تسوي شي وراح تضر حياتها .. :) معليش ع اللقافه خيتو : ريما نويدر :) |
رد: مشاعر فتاة
اخوي الشمالي
وش هالرد يالشمالي والله العظيم ردك اسعدني اهم شي انك دويرت ورجعت وانا ابي ابلغها واشوف بجرب اصير خطابه علشانك بس اخوي الشمالي المهم تشري لي فستان علشان احضر عرسك لك مني اجمل تحيه على مرورك الرائع اختك ريمـــــــــــــاا |
رد: مشاعر فتاة
ريما ياقلبي موضوعك جميل جداً بس تدرين بقولك قصه واقعيه في فتره الخطوبه قال لزوجته كل شيء زين ويوم تزوجت طلعت بلاوي مدري بس ذي قصه حقيقيه والبنت عاد لازم تجلس مع خطيبها لتستشف بعض الأمور لأن الرجال يبي لك عمر فوق عمرك يا الله تفهميه ريما تقبلي ودي وحبي |
رد: مشاعر فتاة
الأخت ريما محمد
تحية طيبة ، اتمنى ان تفكر جميع بنات الناس مثل هذا التفكير الإيجابي ، و دائما هناك ترابط بين أهمية القضية وعمق التفكير !! بمعنى : أن عمق التفكير يكون بحجم القضية فمن الطبيعي أن القضية السطحية أو العادية لا تحتاج كد ذهن أوإعمال للفكر الزواج قضية مهمة جدا وقد تكون من أولويات الحياة ولكن ليست قضية الزواج قضية (( مصيرية )) !! القضايا المصيرية هي التي يتوقف عليها الموت أو الحياة للإنسان أم الزواج فهو من مكملات الحياة ومن الممكن أن يعيش الإنسان بدون زواج بل ورد في سير بعض الانبياء عليهم السلام انه لم يتزوج !! وكذلك في سير بعض العلماء و العباقرة ذكر أنهم لم يتزوجو وعلى سبيل المثال لا الحصر منهم شيخ الإسلام ابن تيمية الذي لم يأت( مثله وبعلمه عالم إلى هذا الوقت) مات رحمه الله وهو لم يتزوج !! الخطأ الذي أرتكبته زميلتك الفاضلة : أنها ضخمت التفكير و تجاوزت حدود القضية وكأنها سوف ترحل بمكوك فضاء إلى المريخ !! من تزوج ولم يوفق فقد سمح له الإسلام بأن ينفصل عن قرينه ( بالطلاق ) ويبحث عن فرصة أخرى في الزواج وهذا الشي من رحمة الإسلام في البشرية أن الزواج ليس مؤبد مثل النصارى لا يتفرقوا إلا بالموت أو الهلاك !! فالمسلم العاقل يفكر بأمر الزواج تفكير شرعي ومنطقي ويعطي المسألة حجمها الطبيعي و كما قيل : الحياة تجارب . في الختام شكرا لك هذا الطرح القيم . ودمتم بخير |
| الساعة الآن (02:42 AM) |
Powered by vBulletin® Version 3.8.7
Copyright ©2000 - 2025, Jelsoft Enterprises Ltd
شركة استضافة:
استضافة
رواد التطوير
مايكتب في هذا المنتدى لايعبر بالضروره عن وجهة نظر ادارة الموقع وانما يعبر عن وجهة نظر كاتبه