[صالح العرجان]

البارحه ليلي هواجيس وضنـون
=دمعي على خدي ومركاي كوعـي

كن الحشا جمره على راس غليون
=يمزٌها اللي ميـتٍ لـه ربوعـي

كل مالتفت وإليا العذارى يبكٌـون
=ثم مزها من حـر هـمٍ يلوعـي

لا ماسهرت الليل يالربع مديـون
=ولا ناقص مالي ولا حر جوعـي

كله من اللي لا رتمش رمح مسنون
=رمحٍ يصيب ولا تـرده دروعـي

اليا ابتسم لي شفتلي در مكنـون
=واليا ضحك حطم بقايا ضلوعـي

غروٍ غريبٍ ساطي الشكل واللون
=جمع جمال البيض من كل نوعـي

روٌح وخلاني وأنا منـه مطعـون
=وقال الوداع معطـره بالدموعـي

قال إعتبرني شخص ميت ومدفون
=ولا عاد ترجي من ورايه رجوعي

قلت المحبه حس فاتـن ومفتـون
=لا هي على طوعك ولاهي بطوعي

كيف أعتبرك الله ينشبك وشلـون
=ماقدر ولو حاولت قلبي جزوعـي

وروٌح وخلاني وأنا منه مغبـون
=والا ترى ماهي بلاش الدموعـي