[بعيدالهقاوي]

ألف : أولف وأول السوق نسبه نسبة تحت ما عاد تحتاج حسبة =سوق ضربنا فوق عشرين ضربة والصبر زين إلا بسهم اللجين
والباء : بدينا وأشترينا وبعنا وياليتنا فيما كسبنا قنعنا =طرنا وتعلينا ولكن وقعنا والصبر زين إلا بسهم اللجين
والتاء : توقعنا تزيد المكاسب وقلنا نبي نشرب لذيذ المشارب =لكن ورطنا بين عارض وطالب والصبر زين إلا بسهم اللجين
والثاء : ثبت عندي بعلم يقيني اني خسرت وراح ما في يميني =الله على تسديد ديني يعيني والصبر زين إلا بسهم اللجين
والجيم : جمعنا سهوم كثيرة ولا درينا أن الدعاوي خطيرة =حتى خسرنا والخسارة كبيرة والصبر زين إلا بسهم اللجين
والحاء : حسافة يا جماعة فلوسي حطيتها بأسهم وكسّرت قوسي =صحيح هالدنيا عطتنا الدروسي والصبر زين إلا بسهم اللجين
والخاء : خلاص اقول توبه ولا أعود لو كنت بالمكسب موصى وموعود=وهذا قرار ما علي فيه منقود والصبر زين إلا بسهم اللجين
والدال : دجينا بسهم المواشي نشريه غالي ثم نبيعه بلاشي =هذا جزاة اللي شرا بالخشاشي والصبر زين إلا بسهم اللجين
والذال : ذاك اللي تسبب علينا ويلاه لو انه يطيح بيدينا =من دون ذبحه كلنا ما رضينا والصبر زين إلا بسهم اللجين
والراء : رمينا رمية دون رامي وصابت وقلنا حرفنة ياسلامي =السوق طيب لين جانا الصرامي والصبر زين إلا بسهم المواشي
والزاي : زدنا يوم شفنا المرابح وقمنا مع العالم نزيد المطابح =ويمكن على بعض السهوم انتذابح والصبر زين إلا بسهم اللجين
والسين : سوينا بها فاهميني نشري نقول السوق بكره يزيني =نبغى المكاسب وأثرنا خاسريني والصبر زين إلا بسهم اللجين
والشين : شاري يومه السوق غالي ما همني لو زاد فيها ريالي =لا والله الا راح باقي حلالي والصبر زين إلا بسهم اللجين
والصاد : صدق اللي سهما منول حول ميه وسبعين واليوم حول =ينزل الى ستين شي يهول والصبر زين إلا بسهم اللجين
والضاد : ضاربنا بسهم الفنادق لكن رمونا مثل رمي البنادق =حتى زبنا بالحفر والخنادق والصبر زين إلا بسهم اللجين
والطاء : طمرنا طمرة دون داعي نبغى النسب بالباحه أو بالجماعي =واليوم يكفينا حليب المراعي والصبر زين إلا بسهم اللجين
والظاء : ظلمني من نصحني بتعمير ويقول لي هذا السهم مكسبه غير =وانا مطبح فيه من دون تفكير والصبر زين إلا بسهم اللجين
والعين : عيوا يرفعون المؤشر يمكن سياسة سوق لازم يخسر =كم واحد من ذا المؤشر مدمر والصبر زين إلا بسهم اللجين
والغين : غيّر يالمحافظ وبدل موضوعنا حله وبالسوق عدل =نظامكم ما هو كتاب منزل والصبر زين إلا بسهم اللجين
والفاء : فتيحي مشترينه بطمعه لكن جانا منه عشرين قمعه =ما اظن يستاهل حسابه وجمعه والصبر زين إلا بسهم اللجين
القاف : قالوا بكره السوق يرتد والوضع اشوفه كل يوم يتعقد =مقرود يامن طاع شور المقرد والصبر زين إلا بسهم اللجين
الكاف : كافي يا وزير التجارة خمسين بالميه علينا خساره =ان كان تفهم في فنون الاداره والصبر زين إلا بسهم اللجين
واللام : لبنى يوم أغارت بلا خيل خذت بسطوتها سهوم الرجاجيل =وخلت مدامعهم تبل المناديل والصبر زين إلا بسهم اللجين
والميم : ما تنفع سهوم العوايد خسرانة وما عاد فيها فوايد =الفايده بالكاش لا صار زايد والصبر زين إلا بسهم اللجين
والنون : نادوا من يعرف السلومي وقولوا توجه يم شيخ القرومي =يحلها لا صار وقت اللزومي والصبر زين إلا بسهم اللجين
والهاء : هروج كل يوم تعادي كل يسوي فاهم ٍ واقتصادي =ياطيبكم عند العشاء والمنادي والصبر زين إلا بسهم اللجين
والواو : وهقنا المسمى ابراهيم يقول انا بقلب جميع المفاهيم =ياعزتيله علقوه الشغاميم والصبر زين إلا بسهم اللجين
والياء : ي طالبك ترحم الناس وان تنتقم من فعل الأنجاس =ولا باس ياللي صابه الهم لا باس والصبر زين إلا بسهم اللجين