ياصاحبـي كنّـا ونبقـى حلاحيـل = للمجد نرقـى فـوق قمّـة جبلهـا
افهم عدل لاتـأول الوضـع تأويـل = والكلمه العوجا من المـزح شلهـا
يومنها بالسيف والرمـح والخيـل = نملك مزاييـن الأبـل مـع فحلهـا
نغير في وسط الضحى واوسط الليل = ونجيبها غصبٍ عن خشـوم أهلهـا
ويـلان حنـا فعلنـا لـه دواليـل = نردم علـى كبـد المعـادي عللها
وان زغردت ام الرموش المظاليـل = وقامت تناظـر كيـف ردّة فعلهـا
نشوش من زود السطر كالمهابيـل = والموت احلا عندنـا مـن عسلهـا
متوارثين المجد جيـلٍ ورى جيـل = فتخيـن الأيـدي كاسبينـن نفلهـا
ويلان حنا أهل الكـرم والمعاميـل = عـاداتـنـا ماغـيّـرتـهـا فللها
لضيوفنا نذبح من السمّـن الحيـل = وقصيرنـا مـاراح يشـكـي مللها
والحمد لله يـوم صـارت تساهيـل = جاها السديد بديـن ربـي شملهـا
يكفي يمثلنا مـن النفـس حلحيـل = مشعل أخو نـوره بجـوده كفلهـا
مادام صارت بالذهـب والتهاويـل = واحيت علينـا عنصريـة جهلهـا
ماعاد نبغى من وراهـا محاصيـل = وقلوبنـا للخيـر ربـي عدلـهـا
نعطي الفقير اللي شكى العوز والويل = وام اليتامـا بذلنـا قـد وصلـهـا
وضعيفنا نرفى خماله عـن الميـل = اخير من دفـع الفلـوس بجملهـا
ونذلل ظـروف المساجيـن تذليـل = ونعتـق رقـابٍ دافـع الله أجلهـا
ياصاحبي نقدر وفينـا لهـا حيـل = ونملـك ملاييـن الفلـوس وهللها
واذا رغبنـا بالليالـي المقابـيـل = تشوف ويلان السعـد وش عملهـا
قلته وانـا مـاودّي القـال والقيـل = حسبي على اللي حيييل كبدي دبلها
للشاعر \ الاطرق الهذال