السلام عليكم ورحمة الله وبركاته..
وكل عام وانتم بخير.. بعد الغياب تمنيت ان اصافحكم بما هو اجمل ..
سامحكم الله بالخطا يا جماعه=ابدمح الزله وابقول خيره
عديتها والحزن يفرد شراعه=عديتها ثم قلت يمكن اخيره
و دام الضماير في زمنـّـا مباعه=نرثي حياة ٍ كل ابوها خطيره
شعر ٍ كتبته والكتابه براعه=دلو ٍ رميته وارتجي كنز بيره
ارمي بدلوي واحتري صوت قاعه=ما سحب رشايه لين اعانق غزيره
و يالله وانت اللي اموره مطاعه=اطلبك تيسير الامور العسيره
شر القلوب اللي تحب اللكاعه=اللي نوتنا بالخفا والجهيره
سم البدن في كل لحظه وساعه=شتت مقاطنهم على كل ديره
عرق الخطر والبهرجه والمياعه=ساس الفتن بين القصير وقصيره
ياوي من درب ٍ يلوح بضياعه=ضياع قلب ..وعقل.. وايضا بصيره
دليتهم لكن فيهم مناعه=عن الدروب الصايبه و النويره
و ادري سعد متمركز ٍ بالرفاعه=وان ما رضو ما هدفو في مسيره
و لو فكرو لحظه بلوية ذراعه=السيف تسمع سلته في جفيره
علم ٍ يجيهم و ارتجي في سماعه=الحر ماله بالعلوم الكثيره
نقلات هرج اهل القلوب الرعاعه=تثر ولكن ما نشب الظفيره
و زول الرجل لو قلت يا فلان راعه= ماتفرقه عن الوجيه السفيره
ويوم ابتديتو بالخطا ياجماعه=ابدمح الزله وابقول خيره