بسم الله الرحمن الرحيم
السلام عليكم ورحمة الله وبركاته
ابيات متواضعه اضعها بين ايديكم علها تحوز على رضــاكم
الليل طال وطولت ضيقـة الليـل = والهم باني بين الاضـلاع بيتـه
ياالله متى يرحل عن النفس ويشيل = ويشـد شـده عقبهـا مارجيتـه
تعبت انـادي للرخـا بالمقابيـل = دامه يصـد ولا يجـي لادعيتـه
وين انت ياللي باخلن بالمواصيـل = ياللي يفز القلـب لامـن طريتـه
فزة يتيمن شاف ويـل وتهاويـل = امه لها مـن اول العـام ميتـه
دمعه بكمـه مايمشـه بمنديـل = حتى مبيته ما اهتنى فـي مبيتـه
حالي مثل حاله بكـل التفاصيـل = دربي على دربه ولـو مامشيتـه
ارفع عيوني بالسما دوم واخيـل = مزن يتناشا ينهمـر لا احتريتـه
ارضي محل ولا انت يدّك هماليـل = لو ماك يشرى غصب عني شريته
تحي العروق وميتات المحاصيـل = وتشوفني من زود خيرك جنيتـه
ونجلس سوا جلسة قصيد وتعاليل = هـاك القصيـد وردده لا قريتـه
منـه تخيـر لحنـه بالمواويـل = واللي تبي سوه علـى مابغيتـه
قلي ترى بيتك يبي شوي تعديـل = لنه بخسني قدري اللـي هقيتـه
واقول لعيونك ابشطـب وابازيـل = كل القصيد اللـي يغثـك محيتـه
الشعر عنـدك ماتفيـده ثماثيـل = لنه عجز عندك ومبطـي حويتـه
لا يابعد من ينقل القـال والقيـل = العاذل اللي عنـد ربـي شكيتـه
ولا يابعد من كثّر الكحل بالميـل = اللي بجمالك فـي جمالـه بليتـه
انت القمر ماهمتك طلعة سهيـل = لو زاد نوره زدت نـور وعميتـه
مير انت من تبعد اشوف البهاذيل= وارجع على مرقابي اللي رقيتـه
اجلس وحيد وسلوتي بالمعاميـل = ماكنـك الا ذاهـبـن مالقيـتـه
قامت تشكى في يديَ الفناجيل = اسهرتها باسباب غرون هويته
وازود الشرهه على البن والهيـل = فنجال وصلـك انتهـى مارويتـه
غيبتك بلوى ماهي لحية تساهيـل = ليتك تشوف اللي بعينـي رأيتـه
ان غبت عني عوَدت ضيقة الليـل = والهم يبني بين الاضـلاع بيتـه
واعذروني على القصــور