يالوايلي فزعتك ماهي غريبه
يالوايلي فزعتك ماهي غريبه = في كل جيل وجيل لك فزعةٍدوم
والفزعة اللي دايماً تعتزيبه = يشهدلها التاريخ أول وهاليوم
بك فزعةٍ بك حكمةٍ فيك طيبه = جعلتها في خصلتك نهج وسلوم
بينت فعلك بالأمور الصعيبه = والصعب في وجهك ترى دوم مهزوم
اتقدم الفزعه بليا ضريبه = واللي نخاك اليوم ماهو بمضيوم
منهونخاك اليوم يلقى مجيبه = اتمد يدك ويصبح الأمر محسوم
في داخلك للطيب ارضٍ خصيبه = ماتبخل بجهدك ولا ترخي اعزوم
تروى ضمامن جاك بأية طليبه = مثل البحار الواسعه تروى غيوم
يانسل وايل والجدود العريبه = يامنبع العزه وبالعز ملزوم
أنت عنزي مافيه شيٍ يعيبه = أنت عنزي معروف اسمك مع القوم
اسمك رفيع ودايماً فيه هيبه = ومحشوم عن فعل الردى دوم محشوم
هذي الحقيقه دون شكٍ وريبه = يقولها ماجد ولا يلحقه لوم
حنابني وايل صدورٍٍ رحيبه = ولاثارة الهيجاء لنا فعل وعلوم
مثل الرياح العاتيه والمصيبه = نقلب كيان الكون ويصير مهدوم
واليا ببغينا المجد دايم نصيبه = ويصبح ترى من حقنا شيء مقسوم
نرقى الطوال ونعتبرها قريبه = مثل البحار الهايجه دايم انزوم
هذي بني وايل بوصفه عجيبه=دايم في بحر الطيب تسبح او اتعوم
وماهو قصورٍ بالقبايل وطيبه= كل القبايل تستحق حبة خشوم
تمت وصلوا عد مطر السحيبه = على النبي اللي عن الزل معصوم
====================
وهبتلك قلبي
ياللي تناظرني بعينك ومهتَمْ= وش قصتك واقف ومخفي كلامك
واقف بصمت وساكتٍ ماتكلَمْ = كن الكلام اعلنت عنه صيامك
صوبت يمي نظرتك دون مفهَمْ =مدري وش القصه ولا ادري علامك
هو مقصدك اعجاب والا مسالَمْ=او مقصدك انا نذوب بغرامك
شفتك وسط تلك العباية ملثَمْ= وشدتني النظره وروعة قوامك
شفت الصفات الرايعه فيك تلتَمْ=واعجبتني والله بحسن احتشامك
قربت عندك قلتلك ياهلا سَمْ=وش قصتك عجزت تشيلك عظامك
هات الذي عندك عسى دوم تَسَلمْ= وياك تعلن صاحبي انهزامك
ارئف بحالي صاحبي دوم وارحَمْ = واكشف عن اعيوني غشاوة ظلامك
اجمع كلامك واحذر اتكون ظالَمْ=واسمع لنا صوتك وبلغ سلامك
انا ترى سبتك صرت اتألَمْ= خايف زمان الوقت لايكون ضامك
ازبن علي ولا اضنك بتظّلَمْ= شدالظهر بيه وخذني حزامك
وان كان ودك قلبي وفيه تحلَمْ= اخذةهدية صاحبي المقامك
وهبتلك قلبي وروحي تسلَمْ=وكل الجسد ملكك و حاضر امامك
وانكنت مغرم فالغرامي تولَمْ=وفطن تراني واقعٍ في هيامك
قلبي مع قلبك حبيبي تأقلَمْ= من يوم ماصوبت يمه سهامك
================
بحسب التخصص ماني اليوم محتال
بؤرة عيوني ياهوى القلب تختال=من يوم نورك ما سقط في بصرها
وحتى اشبكية عيني اليوم تهتال = من ها الجمال اللي بزينه سحرها
واعصاب مخي جاوبتني على الحال =مافيه مثلك ياحبيـبي عـــبرها
وصارت خلايا المخ تبعث بك ارسال= ولمركز الأبصار توصل خبرها
من شان تبقى صورتك دوم بالبال= والعين تسعد فيك كاجمل صورها
و جيت المخيخ وقال منك الشرف نال= وصورتك من عنده لقلبي حدرها
وقلبي تلقاها وغنى بموال = واجمل زهوره يوم شافك نثرها
وبعدك عروق القلب عنها الضما زال=مثل الجذور اليا ارتوت من مطرها
وشريان قلبي من وصالك ترى سال=واسقى أعضاءٍ قبل شوفك هجرها
كنه شعيبٍ أنسكب عقب المحال = واروى بطون الأرض وأسقى شجرها
والكبد قبلك تشتكي سوء الأحوال = ما تهتني في زادها من قهرها
ومن شوفتك صارت تراها على العال= وانا احمد الله زال عنها كدرها
يعني الحقيقه واختصارات الأقوال= انك عديل الروح وايضاً قدرها
وان كان ودك زود في سرد الأمثال= اللي تبين طلتك وش أثرها
اعضاء حسي وقفت لأجلك اجلال= وصاغت مشاعرها ولحدٍ جبرها
غصبٍ مشاعرها لك اليوم تنهال = لأن بصراحه كل مابك بهرها
وهزيتني هزه كما هز زلزال =مقياس ريختر لو حضر مختبرها
وخذت لك في ساحة الجسم تجوال =وشفت الفرح وشلون روحي غمرها
ونحتلك في داخل القلب تمثال= واصبحت في عيني تمثل قمرها
واحييت فيني سيدي كل الآمال = وعالجة نفسي من غثى اللي كسرها
هذا الذي سويت ياسيد الأزوال = وشلون بترك جنتك يا ثمرها
والله حقيقه قلتها مابها أجدال = مافيه غيرك تل روحي واسرها
وهذي القصيده تاصف الوضع والحال= وبنات فكري تعلن إنك فخرها
بحسب التخصص ماني اليوم محتال = نظمت انا ابياتي وهذا بحرها