هذه قصيدة عتب موجهه للشاعر محمد بن فطيس المري ...........
كتبتها بعد مشاركته في أمسية البحرين حينما ألقى قصيدة بالشيخ حمد بن عيسى آل خليفه مدح فيها خواله العجمان
ولم يذكر فيها أولاد وائل.........
إليكم القصيدة
ألا يامحمد بن فطيس ألا يامبدع القيفان=سلام الله ومن بعد السلام أنصت لقيفاني
قصيدة من عتب ما هي قصيدة شاعر طربان=أقدمها وفكري يستفز أعصاب شيطاني
من هجوس ليا جاه الطلب والا لزومه حان=قبل لانخاه لبيوت الشعر ياقف و ينخاني
أصوغ الشعر بافكاري و أقوله واللسان حصان=و أنا من دون ربعي بالمواقف مسرج حصاني
أقول الحق و أبعد عن كلام الزور و البهتان=و حشا ما تطلع الزله يابن مرة من لساني
نيابه عن قبيلة مجدها من ماضي الأزمان=قبيله قبل ميلاد النبوه مجدها باني
بني وايل مزبنة الدخيل اللي زمانه شان=عزيزين الجناب مقدرين الضيف و العاني
أقدم شرهتي عن لابتي وأقول لك غلطان=غلطت و غلطة الشاطر تقيف و ما تعداني
مدحت ابن خليفه يوم جيت بحفله اللي كان=ببحرين الوفا يومك تقول الشيخ ناداني
مدحته في خواله دون تمدح ربعه الشجعان=و نعم في ربعك العجمان من قاصي ومن داني
رجال قدرهم عالي و يكفيهم فخر راكان=ابن حثلين لا دقت طبول الحرب الآذاني
قبيلة عز وتعز الخوي و تقدر الضيفان=قبيله من نسل يام أهل الشيمه والاحساني
و لكن ليش ما ذكرت ربعه عاليين الشان=و هم بين القبايل لهم قدر و رفعة شاني
أنا ما أعتقد أنه سهو و إلا السبب نسيان=لأنك شاعر تتقن بيوت الشعر إتقاني
إذا قصدك على شان ابن عيسى فارس وسلطان=و طيبه من خواله يوم صار الشيخ سلطاني
فأنا أبا اقول لك كلمه مهمه بالفم المليان=حمد قدام هذي من نسل ذربين الأيماني
من الحسني.من دغيم. من السلقا. من الويلان=من رجال الشرف والمرجلة من نسل جداني
يشرفكم نسبه و هو يتشرف طيب الجدان=يشرف فعل جده لأولي و جده الثاني
و مهما كان حنا كل أبونا أخوان مهما كان=و لكن الخطا وارد حصوله بين الإخواني
أنا حبيت أوصل لك رسالة شاعر شرهان=لحقك منه عتب و إلا الخطا ما هو من لساني
رسالة شاعر من بني وايل من ضنا سليمان=من رجال لهم بين القبايل رفعة وشاني
[size=5] [size=4]
================================================== =================================
الـسـدرة
مع غيبة خيوط الظلام و طلعة خيوط الفجر=كان الوعد بالسدره اللي ما بعد مريتها
أقبلت ادرج خطوتي و امشي تحت نور القمر=و اردد ابيات" لميعاد الغلا سويتها
أردد ابياتي بصدري وانا اتوخى الحذر=أخاف من زله توهقني ليا زليتها
و مابين انا ماشي بدربي من ممر إلى ممر=و وصلت جذع السدره اللي من غلاها جيتها
إلا و صوت اقدام مضنوني مع اوراق الشجر=كنه يحيي جيته يمي و انا حييتها
من خف خطواته ما تترك بعد ممشاها أثر=و إلا هنا يا ثقل منزلها و مكبر بيتها
في حينها شفت السما به بدر و قبالي بدر=لحظه عساني ما اعدمها كل ما اتمنيتها
و أبياتي اللي كنت ارددها بصدري من عصر=ضاعت!! و ما كني لميعاد الغلا عديتها
ورجعت اصوغ ابيات شعري له شطر . شطر . شطر=و من زود فرحة خاطري في جيته غنيتها
غنيتها و أنا بوجهي حزن و بصدري قهر=من حزة يضيق بالي كل ما استنيتها
حزة وداعه لانتهى الموعد و جا وقت السفر=و ناظر لساعة يده لامنه وصل توقيتها
بس المهم رحبت باسمه بالجوارح و الشعر=ترحيبة يروق بالي كل ما اطريتها
يا مرحبا ترحيبة" تشبه لزخات المطر=لا بللت معطفتك الملفوفه و ضميتها
لبيه يا نورك ليا اضفى عالمي شبر . شبر=لبيه لا من دلني حروتك لا ضليتها
لبيه يا سكة ضلالي يا هداي المنتظر=اللي لعينه ناس كارهها و ناس اغليتها
يا فاتني يا ورثة بيوت المعزه و الفخر=ياللي أحاسيسك تلبيني ليا ناديتها
يا اسمى الخصايل و الصفات اللي تضمنها بشر=يا معجزه لو جيت اوصف حسنها ما اوفيتها
تدري اشلون بدون كثرة فلسفه و بالمختصر=قلبك مدينة حب طابت لي و انا احتليتها
لو الثمن عمري لشوفك قلت يفداك العمر=روحي لشوفك لا قسم بالله ما عزيتها
ما جيت لك و انا أبي "اصطاد بالماء العكر"=جيتك و أنا عروقي بدم أهل الشمال أسقيتها
ما جيت أبا استغل طيبك بالدهاء و بالمكر=جيتك على نهج الرجال اللي يشرف صيتها
جيتك و انا ابا اضفي على منكبك جلباب الستر=هذي نواياي الشريفه عنك ما خبيتها
جيتك و انا مليان راسي بالطنا منذ الصغر=يوم اني اجهل قيمة الغلطه إذا أخطيتها
قدام لايطلع لشعري فيك صيت و لاذكر=يوم اني ادرك شوفتي لك كل ما بغيتها
و الحين لامن جيت اشوفك مت و آنا منتظر=ياليتها ترجع بنا أيام الزمن ياليتها
يا صاحبي جت حزة فراقك و جا وقت السفر=و اللحظه اللي خفت منها وصلت لتوقيتها
لكن قبل لا تروح ودي التمس منك العذر=عن كل زله مني بحقك و انا زليتها
يمكن بعد ميقاف هالسدره ما يجمعنا القدر=ولا يبقى الا اشرطة ماضيك لا فليتها
و اقفيت و آنا اقول يا قلب الوفا كل الشكر=لانك تداركت العروق الميته و احييتها
================================================== ==================================
قصيدة بمناسبة حضور سيدي صاحب السمو الملكي
الامير /فـهـد بن سـلـطان بن عبد العزيز آل سعود
إلى محافظة تيماء وضواحيها ولقد القيتها على مسامع سموه في الحفل الترحيبي المقام بالمحافظة
بـاسـم الاله اللي عليم في مغيبات القدر= الخـالق المعـبـود سبـحـانه لـكـل امـر قـديـر
اللي ينزل من بياض الغيم ومزونه مطر= اللي عـباده مـن عـذابه تـستغـيث و تستجـير
إلهي انت اللي خلقت انواع واصناف البشر= فـيهـم امـيـر المجـد و العـفه ولـلذمة سـفـيـر
وخلقت فيهم سيدي تاج الرجوله والفخر= فـهـد ولد سلـطان تاج العـز والمجـد الكبـيـر
نسل الرجال اللي لهم بالوقت موقف معتبر= استغـفر الله! ما هـو بموقـف مواقـفهـم كـثـيـر
عيال عود لا تكلم يرتجف صم الحجر= عبد العزيز اللي يفرق سيفه الجمع الغفير
اخوان نوره مرويين السيف بالدم الحمر= منـكـليـن عـداهـم الغـاديـن بالسـيـف الشطيـر
سووا من عداهم مع التاريخ للعالم عبر=عبرة لمن تغويه نفس الشرالى سوء المصير
يا سيدي جيتك وانا في خاطري علم وخبر= جيتك وانا فكري سبق سني لاتحسبني صغير
شاعرواصوغ بهاجسي شعري على وزن وبحر=ويسهل علي القاف يوم انه على غيري عسير
لك قدموني كل اهل تيماء وانا كلي فخر= قالولي اشكر شخص حاز المجد والاسم الشهير
اشكره باسم الباديه واهل المدن واهل الهجر= و انت الوحيد اللي من الشعار بالوقـفات غيـر
قلت اشكره! والله مايجزنه عبارات الشكر=هــذا فـهـد قـدامـنا وحـنا عـلى نـهـجـه نـسـيـر
وصفه صعب لكن اقول بهرج وافي مختصر= حـكيم راي وسـيرته بين العرب خـيره وخيـر
يا سيدي لو رد فضلك بالقصايد و الشعر= يـشهـد عـلي الله لاكـتب ليـن مثـواي الاخـيـر
انت الامير اللي تغنى بسيرته كل البشر=يا ماسـح دموع الـيـتامى وجـابـرٍ حال الـفقيـر
يا ميرنا اللي مبدئه تقريب وجهات النظر=تقريب وجهات النظر بين المواطن والامير
يا محارب درب الظلاله والجهاله والفقر=يالـلي سعـيـت لـنـشـر دين الله والعلـم المنـيـر
يا راعي النوماس بين الناس يا اغلى بشر= يا اعز من يمشي على الدنيا وباقدامه يسير
يا سيدي حنا حزامك بالزمن طول الدهر= معك معك لا ثارت الهيه يصير اللي يصير
امر وحنا كلنا طوعك بتنفيذ الامر=رهن الاشارة لو تروح ارواحنا ما هو كثير
يا سيدي لو جيت اعبر لك عن اللي بالصدر= يبغا لي اكتب لين ما يطلع على الدنيا نذير
الناس قالوا حكمة اهل الشعر دلل واختصر= إلا انت ما يكفيك من شعري قليل من كثير
لكني ادعي كل ما يطلع علي نور الفجر=يالله تطول لي بعمره يا سميع ويا بصير