[مشعل الضوي]

يبراني الله كان قلبي خاف وانا جعفري

ما بين فزعات النصيب و بين كبوات النصيب=أسوق رجلي للطريق الصعب و أمد نظري
أكرس جهودي و أنا نفسي على نفسي رقيب=و أتعب على العليا و لو طول مسيري و سفري
أجنب الدرب الخطا و أمشي مع الدرب الصويب=حتى و لو يذبل جفن عيني من آثار سهري
و أقاوم الدنيا و لو جرحي ما داواه الطبيب=و أضحك و اجامل لو دموعي ضاق فيها محجري
و أعمل و لو قالوا لي إن الذيب في وسط القليب=و تعجز ظروف الوقت و الأيام لا تجيب خبري
و تصغر همومي كل ما ناديت بالصدر الرحيب=و تاصل طموحاتي و هقواتي زحل و المشتري
و آقف لربعي مثل وقفة سالم الزير لكليب=من دون ربعي لا. لا. لا بالله تراني عنصري
هم درع جنبي لا عوا في عالي المرقاب ذيب=هم تاج راسي كل ما آخذ من هل الحقد حذري
ربعي مدارس عز لا تفنى و أنا "طالب نجيب"=ربعي قمم أمجاد باسم أفعالها أشد ظهري
ربعي شجاعة . مرجلة . مكانة . و هيبة . و طيب=و أنا على فعل أهل الأمجاد و العزة جري
و ان كانها بالشعر و الشعار و أنا ابن غريب=ما همني إبداع "أبو الطيب" و شعر "البحتري"
و إن كانها بالفعل و الميقاف و الوقت الصعيب=يبراني الله كان قلبي خاف و آنا "جعفري"
أنا طويل الرمح لا اقتص الطليب من الطليب=تاقف عداي اللي تعاديني و لا تقص أثري
يوم انها بمصقلات الهند و الضرب العطيب=يوم الرجل في روحه الثكلا يبيع و يشتري
حنا الرجال اللي مواقفنا الشريفة ما تغيب=لو هو يحرف راعي الحبل القصير و يفتري
من ديرة الخنفة . ليا الحيزا . لتيماء . للكتيب=وواصل إلى ساحوت . و لبيضا نثيل . و للفري
و من فيضة ابن سويلم . ليا البدع . لا حد القليب=معالم يدري بها اللي بالسوالف ما دري
لا جيت ابا أعدد ديرنا ويش أخلي و ويش أجيب=يفقر هجوسي لو هجوسي من جزل شعري ثري
لكن ليا منك لقيت الطيب و الصدر الرحيب= تأكد إنك مع "ضنا عليان" و إلا "جعفري"