[نايف الشبيعان]

قصيده حينما كنت في وقت الربيع بالقرب من قرية (قبه)
والقصيده وصف لماكنت أعيشه في تلك الأيّام
أتمنى أن تحوز على رضاكم وإستحسانكم

الروض أخضر والهبايب نسانيس=والليل أقمر والخباري ملايا
والعشب شابك مدّ شوفك ولا ديس =قفرٍ خلا ماجاه ذودْ وشلايا
فيه أمّ سالم رحبت بالعواسيس=ونوّارة الحوذان تعطي تحايا
مرتاح بالي دون همّ وهواجيس=وأقصد وأهيجن من خلاي بخلايا
والحمد للمعبود مابي وساويس=وأقول يالله لاتخيّب رجايا
لا صرت متعافي ولا بي حواسيس=حصّلت مطلوبي وغاية منايا
ماني من التّجار ولّا المفاليس=القى فطور الصبح وألقى عشايا
وإن نمت مالقى في منامي كوابيس=مرتاح مابيّه جروحٍ سطايا
أمشي علىالموتر بذيك التضاريس=وأسوّي الفنجال محدٍ معايا
الله ولا شوفت وجيه معابيس=اللي إذا جوني تنقّض بلايا
جلست خلا الذّ من جلست الهيس=اللي يعذربني ويضحك معايا
لا سب لا غيبه ولابه تلاغيس=ولا سخف هرج ولا مغازل صبايا
أعوذ بالرحمن من همزة بليس=وأناجي اللي عالمٍ في خفايا
واليا بغيت أونس النفس تونيس=كلّمت أنا اللي ماتداني بطايا
بنت الرجال اللي تحوش النواميس=النادرين أهل الصحون الملايا

وسلامتكم