مصافحه أولى كلي أمل أن تجد في ذائقتكم الراقيه ترحيبا وقبولا ..
بنت الرجال تشوم عن درب الانذال=وتبعد جنابه عن دروب الرديه
ماهي في درب العشاشيق تختال=ولاهو طموحه يوم تصبح خويه
ولاهي بتشرى بشحن هاتف وجوال=ولا لا ولاتشرى بعطر وهديه
ولاهي من اللي كل يوم(ن) لها حال=وعنده من الاصحاب عشره وميه
اليوم مع هذا بلا شك وجدال=وبكرى مع هذاك تعقد يديه
هذاك ترسل له من الحب مرسال=وغيره معاها بالمسنجر سريه
تضحك عليهم واتغنج وتحتال=وهم ياحرام يجون باجزل عطيه
أحد(ن) تبي منه أسوار وسلسال=وأحد(ن)فواتيره يسدد هديه
وأحد(ن) لها يحول ألوف(ن) من المال=وتضحك وهي تقول دينك عليه
وش ينفعه لاقيل بالأسم رجال=والبنت تلعب فيه صبح وعشيه
أنا اشهد انه لو لبس بشت وعقال=ماجمله بشته بعين اجوديه
ووش عاد لو هو مالك قصور واموال=واسمه مسجل شيخ وسط الهويه
الشيخ من بيته للاجواد مدهال=ماهو بشيخ فلوس لارحم حيه
وبنت الرجال اللي تعزوى بها رجال=عينه على الاشباه ماهي شقيه
مايشوق بعيونه سوى طيب الخال=اللي يدينه من عطاها نديه
عينه على الطيب تناظر وتختال=ولد الرجال اللي علومه غنيه
ولو كان مايملك بيدينه ريال=ويده من كنوز الدراهم خليه
يكفي ألى من مر ذكره بالامثال=والكل قال ونعم ياحي حيه
ألماسة(ن) ماكل من هامها طال=وكل(ن) يبيها بس ماهي دنيه
مصيونة(ن) عن قول حاسد وعذال=ومحشومة(ن) عن درب ذم وخطيه
تخاف من هرج(ن) يجي فيه محتال=حكيه شهد مدسوس في سم حيه
الطرف يغضي غصب لاشاف رجال=والعين ماله بالنظر مقدريه
هي مهرة(ن) مايعسفه كود خيال=ذيب(ن) سنافي عز من هو خويه
حر(ن) شلع مابين هامات وجبال=له نظرة(ن) ترث بالاعماق كيه
على النقى يصبح لها في وظلال=قدام كل الناس ماهي خفيه
بوضح النهار بدون ريبه ولا اقوال= الصح واضح والخطيه خطيه
هذي هي اللي تنشرى بغالي المال=ويرخص لها الغالي وتشرى يديه
وهذي تساوي بعزته ألف رجال=وش عاد لو هي بالمسمى بنيه
وهذيك ماتبغى ولو مهره ريال=ولااحد(ن) يبيها كود خبل(ن) دهيه
سبحان من هو فرق الناس بااشكال=وألوان وأفعال(ن) وحسنى وسيه
ومثل مافيه رخوم بالناس ورجال=أيضا بنات الناس ماهن سويه
تقديري للجميع