احبائي اعضاءوزوار هذا الصرح الشامخ بكم
إليكم هذه المتواضعه أمل أن تنال رضاكم
وكل عام وانتم بخير
يالله ياعالم خفي الكواليس=تزيل همٍ بين الاضلاع لاسي
همٍ على قلبي بنا له متاريس=والصبر ما ينطاق والوقت قاسي
وعجزت اميز سهلها والتضاريس=تشابه الاشكال عندي سواسي
من خلقتي وانا اسمع بلقطة غليس=ودارالزمان وجابها فوق راسي
ياطير ابن برمان وش جبت بالكيس=وش جبت لي ياطير وسط الكياسي
مايشفي المرضان قولتك لا بيس=ولاينخدع راع الذهب بالنحاسي
والنار ماتشعل بليا مقابيس=والبيت ما يعمر بدون الاساسي
رمت بي ايامي بهيسٍ ولد هيس=الصحبه اللي من سببها انتكاسي
كنت احسبه من كاسبين النواميس=اللي على الطولات والعز راسي
غرتني الكشخه وزين الملابيس=وخدعني الديكورخلف اللباسي
لو الرجاله بالمتر والمقاييس=عزالله كتوفه تهز المقاسي
بالكذب والهذره بنا عرش بلقيس=وإلاالحقايق غير صفة كراسي
يذبح ويصلخ في زمان المتاعيس=بفلوسه اصبح شيخ نسل الهلاسي
مظهررجل والخافي ألعن من ابليس=وابليس ملعون النسب حيل خاسي
همه يسافر يم لندن وباريس=ويرجع لنا(بربطه)وكعب المداسي
ويقلد اخته بالعيون النواعيس=إلا ويقلدها ببعض اللباسي
تشبهوا بالغرب بابا وقسيس=الله يستر ماتعمر كناسي
والصحبه اللي مثل صحبتك يالهيس=احسن تفارق قبل تجرح احساسي
أخوكم:رابح الغضيان
................
.
.
عطر ..لميس
ماعاد به تكفى ولاعاد تنقال=كلمه قديمه من يهزه صداها ؟
والغيره اللي نوب نلقى لها ظلال=قتلوا عياله والمعزب وطاها
تبدلت يا سيدي حال في حال=حالٍ على الله حلها ومنتهاها
زمان معك ريال تسوى به ريال=وتصيرفارس قوم فيك انتباها
زمان فيه العولمه فعلها طال=ومن لادخل فيها سرح في حماها
وبدل عرب صرنا طرب لال يا لال= انجازنا (غنوه) ومن مستواها
ولاصار رب البيت للدف طبال=اكيد جاهلها كفيل بعماها
راشد يذم رشيد , ورشيد محتال=وحنا الضحيه والهدف ومغزاها
من قال هتلر مات هتلر ولازال=هتلر رسم خطه وخيه مشاها
يا جيل صدقني ترى العود دجال=خطة صليبي والعريبي كلاها
اقوالنا لعبه ولعبتهم افعال=وحنا نردد ياعساها عساها
لاوين ياجيل الدعايه والارسال ؟=سلعة ردي الساس من هو شراها
قتلن بنات شيوخ لعيون فريال=وفريال بنت الغرب نطلب رضاها
شجاعنا يبكي على بعض الاطلال=وهامورنا يرقص ويدفع عشاها
ادبك ورى ليلاك واربط لها الشال=والرقص دبكه وارقصوا يا قصراها
واشتر عطر لميس يا طيب الفال=تحظى بلميس وخيها واقرباها
يلعب علينا تاجر الفقر موال=يالعن ابو لميس واللي غذاها
ماكل من ركب على الغتره عقال=قد العقال وكلمته لاحكاها
إلا رجال الطيب للعز مدهال=عن الردى تكرم وتحشم لحاها
من يفهم القصه يدرس له اجيال=ومن لا فهمها يعجبه محتواها
ولازلت اقول رجال باقي به رجال=سيوف مسلوله على من نواها
جبال الجزيرة يوم تذكر لها جبال=آل السعود اللي ذرانا بذراها
لامال عفش شعيل تعباله حبال=يمشي ورجله فوق راسه ثناها
...................
.
.
العيااداات
ياليتني ماجيت قسم العيادات=صادفت حوريه على صورة انسان
ماني بيمه بس قالت سلامات=هي قالته : فرفشت من غير جنحان
فكرت اكسبها ببيتين جزلات=قلت اسمعي شاقول ياعود ريحان
من شان عينك باتفنن بالابيات=واصير لك شاعر وراوي وفنان
بالشعر لي دوله تهابه دويلات=واهز واشنطن ولندن وطهران
وعندي على بحور الشعر سبع موجات=واخيرك يازين باشكال والوان
وبنيت في سطح القمر لي مدارات=اقطارها عينك ورمشك والاوجان
وتردده يفوق كل القنوات=ارسالها همس ومشاعر ووجدان
ياللي اسرتيني بسودٍ ظليلات=سبحان ربٍ صورك جل سبحان
لو آصفك قالو خيال ودعايات=معقول فوق الارض يوجد كذا انسان
تقول لي بالهون ياابو الخيالات=وبعض الخيال بدهورك في خبر كان
تشر علي تقول دورك ترى فات=شف الممرض يزهمك دوركم حان
هي صادقه نادوا علي خمس مرات=ماني هنا ياناس .. فيضت وديان
هي طالعه وانا دخلت الملفات=ابي عيادة باطنه رحت الاسنان
نسيت مافيني وعفت العلاجات=واصبحت متعافي ولاني بمرضان
طلعت آبا اعرف وين راحت وبسكات=حصلت خيه يصرف علاج عجلان
حركت وبسرعة قطعت الاشارات=الرنج راح وسايق الرنج بطران
ضيعتها بالحي بين العمارات=فلل تشابه بالزوايا والاركان
ضيعت بيته وسط حارة بهاوات=في حي راقي ما سكنه شخص طفران
سيارتي شبهه , بحيه همارات=وفياقرا وجموس ماتشوف نيسان
لفيت حارتها يجي عشر لفات=طلع علي جاره يقول انت سكران
قلت العفو .. مضيعٍ لي قرابات=مامرك اسم فلان وفلان وفلان
اسماء غريبه جبتها كيف هي جات=ناظر وقال الله يشافيك تعبان
الله خلق خلقه وفيهم درجات=وهي بنت عز وزاد من شانها شان
مصيفها بيروت وإلا الاهرامات=وانا مصيفي بين طلحه وشعبان
الفرق واضح بيننا في علامات=وهقت نفسي كيف انا كنت غلطان
قصده تعاطف يوم قالت سلامات=وجيتك من اقصايه على غير عنوان
والموعد اللي من سنة بالعيادات=طوفته بساعة على شان الاعيان