[سعود المسعودي]

يقيمون تحت كوبري الستين وبلا هوية
متخـلفـــــون حـتــى الــمــوت




عبدالرحمن الختارش - جدة تصوير: محمد المالكي
تجمع أكثر من 1000 متخلف من جنسيات آسيوية وإفريقية ممن تأخروا في العودة لبلدانهم عقب أدائهم العمرة والحج تحت كبري الستين في جدة ، فيما اعتبرت إدارة الجوازات هذه التجمعات حيلة يستخدمونها ليظفروا بالتسفير المجاني إلى بلدانهم.
وجود المتخلفين أثار حفيظة الأهالي الذين أبدوا قلقا بالغا من تواجدهم بهذه الأعداد الكبيرة لافتين إلى أضرارهم المحتملة من تسول وانتشار للأمراض وغياب النظافة بالإضافة إلى الإزعاج الذي يسببونه ومنظرهم غير الحضاري.
وفي مركاز مجاور لكبري الستين اعتاد كل يوم أن يجتمع عصام ورفاقه ولكن هذه المرة سيطر المتخلفون الذين حولوا المكان إلى منازل في الهواء الطلق على حديثهم بشكل يدعو إلى القلق من جرائم قد ترتكب أو أمراض تنتشر متسائلين عن المسؤول وراء تكدسهم بهذه الطريقة وكيف يمكن حل هذه الأزمة سريعا قبل أن تتفاقم. أمور كثيرة سيطرت على الحديث وهم يشاهدون العدد الكبير من المتخلفين أمام أعينهم منهم المرضى والأطفال والنساء في وضع يرثى له؟!
عصام : بصراحة وضع المتخلفين ما يطمئن أبدا .
عوض : معاك حق ولهم أكثر من شهر هنا ينامون ويأكلون ويشربون تحت هذا الكوبري
ايمن : لا ويغسلون ملابسهم هنا والله يكرمكم يقضون حاجاتهم في الشارع .
عصام : هذا الشي يخوف لأن الأمراض ستنتشر بينهم .
ايمن : أكيد ولا تنسى أنهم يعيشون هنا وفي ناس حولهم ومطاعم واللي أخاف منه ان الأمراض تنتشر وتوصل لنا.
عوض : أنا بنفسي مريت بموقف يؤكد كلامكم قبل كم يوم شفت واحد من المتخلفين اللي هنا تحت الكوبري يحك في جسمه وقفني طلب مني أوديه للمستشفى بصراحه أنا خفت منه لأن جسمه كان كله حبوب من رأسه حتى رجله وما أخفيكم إني حزنت عليه وفي نفس الوقت مقدر اوديه للمستشفى فرحت للصيدلية وكان هو واقف برا يستنى كلمت الصيدلي واعطاه دواء تركته ورحت وانا خايف من العدوى .
عصام : هذا اللي نخاف منه لكن الله يستر
خالد : طيب فين الجوازات عنهم ما تقولوا إنهم متخلفون؟
ايمن : أنا بنفسي شفت اربع سيارات تابعة للجوازت هنا تتكلم معاهم هذا الكلام قبل شهر تقريبا وبعدها ما تغير شي هذا حالهم
عوض : بصراحة مشكلتهم مشكلة لانهم يبغوا يسافروا لبلدهم ويطلبوا من الجوازات تسفرهم .
خالد : ليش ما تسفرهم طيب ؟!
عصام : ياجماعة الموضوع ماهو بهذي البساطة الموضوع كبير وبعدين الدولة ليش تتكفل بسفرهم طيب فين السفارات حقهم وفين المؤسسات اللي جابتهم للحج أو العمرة ليش ما تسفرهم ؟
عوض : هذا الكلام الصحيح وبعدين لا تنسوا أنه قد يكون فيهم ناس مطلوبون أما يكونوا حراميه أو حتى مسوين جريمة أكبر من هذي وما هو معقول تجي الجوازات وتسفرهم على طول !!
ايمن : قابلت واحد من جنسية آسيوية تصدقون يقول انه جاء للمملكة قبل سنتين للحج وبعدها اشتغل كهربائي وبدون اقامة والآن يبغى يرجع لبلده ، بصراحة هذا الكلام مو معقول أبدا وأنا أشوف انهم لازم يتحاسبوا ويتحملوا اللي يجيهم .
خالد : طيب لازم في حل .
عصام : انا اشوف انه لازم يكون في عقوبات من البداية وتعالوا أسألكم كيف وصل كل المتخلفين اللي شايفينهم هنا اكيد عن طريق مؤسسات حج وعمره وإذا كان ما نبغى مثل هذي المشاكل تتكرر لازم الدولة تفرض عليهم اشد العقوبات عشان تنتبه لمعتمريها وحجاجها التابعين لها وتحرص على رجوعهم لبلدهم في الوقت المحدد لكن اذا استمر الوضع على هذا الحال راح نشوف كل يوم مثل هذي المشاكل .
ايمن: طيب في عقوبات على المؤسسات وانا بنفسي قريت انهم عاقبوا اكثر من مؤسسة
عصام : من فين كل هذي البشر اللي قدامك !! ياخي انا اقول انه في عقوبات لكن غير رادعة ولازم يطبقوا اشد العقوبات عشان تنتبه هذي المؤسسات سواء كانت في الداخل او الخارج .
خالد : والله معاك حق يا عصام لان دور المؤسسات كبير جدا لكن لاتنسوا ان همهم الوحيد الارباح وبس واذا وصلوا المعتمرون هنا خلاص مالهم دخل يروحوا محل ما يروحوا عشان كذا انا اتفق مع عصام بأنه لازم تكون في عقوبات قاسية عليهم .
عوض : اكيد سمعتم انه في واحد منهم قبل اسبوع تقريبا مات تحت الكوبري من المرض.
عصام : الا صحيح وانا شفت الناس متجمعين حوله .
ايمن : وفين ودوه طيب ؟
عصام : سألت الناس اللي كانوا متجمعين هنا وقالوا في واحد مات لانه كان مريض واتصلوا بالشرطة يمكن سلموه للبلدية عشان تنهي اجراءات دفنه
خالد : لاحول ولا قوة إلا بالله العلي العظيم ، تصدقون موتهم فيه تعب لانه كيف يدفن وما عنده أوراق رسمية
عصام : ليش يجلسوا هنا وهم يعرفون ان اوراقهم غير رسمية اذا مرض فيهم الواحد ما يقدر يروح للمستشفى واذا مات يتعب أصحابه ويتعب الجهات الحكومية.
ايمن : لكن أنا أشوف انه لازم يكون في حل سريع لمشكلتهم جلستهم هنا كل ما تطول راح تنتج عنها مصايب، أول شي الناس ما عندها فلوس وتبغى تأكل وتبغى تتعالج وإذا استمر الوضع بنلقاهم بكره ولا بعده يسرقوا البيوت والمحلات التجارية اللي حولهم وهذا يخلي الجرائم تنتشر عندنا في الحي ويمكن في البلد إذا انتشروا .
خالد : وبعضهم ممكن يطفش ويروح يزور إقامة ولا أي شي ويرجع يعيش مره ثانية بطريقة غير نظامية وهذا كمان يساهم في ارتفاع نسبة الجريمة .
عصام : طيب ليش ما تاخدهم الجوازات عندها في التوقيف .
ايمن : بصراحة حتى الجوازات ما نقدر نلومها ليش تتكفل بأكلهم وشربهم وتكاليف سفرهم خلونا نقول فين السفارات عنهم هي المفروض اللي تتولى أمرهم وتنسق مع الجهات المعنية لترحيلهم.
عصام : ما نقول غير انشاء الله تنحل هذي المشكلة في اقرب وقت ولا تنسوا ان الحج على الأبواب والخوف من تفاقم المشكلة وزيادة عدد المتخلفين .
ايمن : الله يستر واتمنى حل جذري لهذي المشاكل.