[ماجد الغانم]

...
.
أعزااائي في هذا الصرح الجميل

اليكم هذه القصيدة

التي أتمنى أن تنااال أعجابكم ..وترضي ذائقتكم
....
.
.

الحر يكـفخ للسماء مايهمه = ولا يلتفت للأرض ياكـود للصيد
دايم مقرة معتلى فوق قمه = وعن عادته لو طال وقته فلا يحيد
فعلة شريف ولابنا من يذمه=ولاهو محصل في صفاته مناقيد
ان جيت للنظرة تأدي مهمه = واحيان حرة نظرته يمكن تبيد
كذا عرفت الحر فعلة يتمه = وان شن غارة ماسبقها بتهديد
ماهو من اللي نظرته صوب كمه = رفيع همه مارضخ لاي تقييد
هقوته ماتقبل قيودٍ تظمه =يكفخ بجنحانه على كيف مايريد
وقوة طموحه للمعالي تزمة = طبعه كذا ماضفت له أي تجديد

.
.

الشهم ماتحجب فعايله غمه= تقدح فعاله مثل نار البواريد
ويحن يم الطيب كالطفل لأمه =ويفرح بفعله فرحة الطفل بالعيد
واذ هي على الفزعه عميقٍ مجمه= يروي بفزعاته رجالٍ مجاهيد
(ذا راعي الفزعه بلاشك سمه) = له فزعتٍ ماقننت بالمواعيد
وهذا قرين الحر والقول ذمه = ولا هو بحاجة لاي دعمٍ وتعميد

.
.

والا العفن بارد شعوره ودمه= متجردٍ فعله من الطيب تجريد
لاراي ماشيبه ومبدا يعمه =والفعل ماحصل من القول تمجيد
كلمة( انا) في معجمه كل همه =ومحصلة كذبه مع العالم اتزيد
لا لا يغرك لو فتح كل فمه = الديك وش ينفع صياحه لويعيد
مثله تذمر منه خاله وعمه = مافيه عز ولا تحكمه تقاليد
ولحدٍ تنبهله ولا لد يمه= لانه فشيلة ينتمى للأجاويد

.
.

عمر المهايط مابنى مجد امه = وعمر( الأنا )ماوصلت بالمدى ابعيد
المجد مايبنيه هامل و(.....) = المجد مايبنيه كود الصناديد
اللي على عداهم حراباً مسمّه= واقوالهم ماتخالف الفعل بالأيد
درسٍ شرحته كل فاهم يصمه = دخلت في صلبه ومن غير تمهيد

........
.
.
وسلااامتكم