بدون تقديم اهدي هذه الابيات الى زملائي المعلمين
يامعلمين المملكه تباشروا بآخر قرار = اخر قرار ماصدر حتى صدر عن مكرمه
المستوى الثاني حجز اوكيه عقب الانتظار =واقلع بلا إياب .. لاترجون ساعة مقدمه
انتم على الخامس ومن جاء بعدكم نفس المسار= مبروك مع غض النظر عن بعض امور ٍ مبهمه
يعني لوفروق السنين الماضيه راحت جهار =او صار والراتب رجع كـمّ درجه في سلمه
عادي ترى هالأمر مايؤخذ بعين الاعتبار = والرجل في قول المثل لاجاه شي ٍ يغنمه
صحيح ابوخدمة سنه {ماهو حسد والا احتقار } =يصير مثل اللي خدم خمس سنوات متممه
لكن هنا نلحظ جوانب للبنا .. خل الدمار = اصلا خطانا نلتفت نحو الامور المظلمه
لازم نصحح فكرنا حتى يشوف الازدهار = والناس ماتعطي رجل رب المخاليق حرمه
والمقبلات من الليالي كلها خير وعمار = ترى العلاوه طيبه ووجود شي ولاعدمه
شوفو أنا من فرحتي بغيت اشمع في جدار = من بعد حسّبت الزياده قمت اهمهم همهمه
ثلاث ميه فوقهن خمس ريالات ... ولا اغترار = والوقت هذا فيه ربع القرش حاجه قيمه
تجيب لك كرتون بيض وكم دجاجه مع خضار = والحمد لله جسمك بخير وبجلده ولحمه
لاشك قــيـّـل كل مـافــليت كن باقي نهار =والليل نم بدري تجي بدري بحسب الانظمه
وقف مع الطابور وقفة عز مافيها انكسار = انته مربي جيل مسلم في بلاد ٍ مسلمه
ترى النبي قال بحديثه (لاضرر ولاضرار) = وان مافهمته شف معلم دين يقدر يفهمه
وابشرترى يبقى معك خمسه وهذي باختصار = عطها تلاميذك وقل هذي تراها مكرمه