ياحال وش باقي بعد حال الشقا والضيم حال
يخرب مزاج الليل لاغطى العيون الناعسات
تعال ياعمر الهنا المزعوم عمرالضيق طال
مبطي وانااصحيك لين ازريت من طول السبات
شاعرتعبت أكتـب غزل لعيون ربات الجمال
واعلق احلامي على رجوى السنين المقبلات
ياصبروين اهرب من الواقع ومن ضنك السؤال
لاقيل لي وش فيك ضايق واعتلى وجهي سكات
ياعونة الله ياالطعون اللي ورا ضلوع انحال
لادكت بصدري على صوت الجروح الداميات
علمي بساعات الهنا والبهرجه من وسع بال
باول ثلاث سنين من عمري مضن متواليات
قدام لا اشوف السعاده شي من نسج الخيال
وامد كفي للأماني والعواصف عاتيات
ياماتقهويت الضماوارخيت متني للثقال
واظفيت جلبابي على ثكلى المتون العاريات
طفل تمره ذكريات العيد بعيون الخيال
لاتاه به لون الخضاب اللي على كفوف البنات
واغراه تلوينة هدايا العيد بيدين العيال
وعطف الكبير؛وضمة الوالد؛وحضن الأمهات
مالابتسامات الطفوله في صباه اية مجال
يصحي على موت امنياته وانجلـى نومه وبات
تغنيه عن كلمة((وليدي))لاحضن جرحه ومال
وتغنيه عن كلمة حبيبي ((صبرواللي فات مات))
من وين ماترحل به الذكرى لهاشدالرحال
واستوحش الدنيا وعبرات المحاجرجاريات
يملك قناعه بأن ماهوكل واحد قال نال
وان الحياة دروس تعطي للبشرنصح وعضات
والصبرمفتاح الفرج والعفو نوع من القتال
واحسن من العيش بمذله نفس تختار الممات
ماقلتهامن باب فرض الراي اوخلق الجدال
وامثل افكار النوابغ واقتبس فكر الدهات
اخذت من طبع البداوه درس وعلوم الرجال
اللي مماشيهم على درب العلوم الغانمات
رباني اللي للمراجل والسلوم أعظم مثال
عوداليا بانت نوايبها يعدل المايلات
بيته لوجه الضيف والعاني ذرى عزوطلال
ومكانته عند العوارف فوق روس النايفات
علمني ان العمر مهماطال يقفاه الزوال
وان الثمينه كايده والظلم جراح اللهات
والمال قوت الحال وحقوق البشر مثل الجبال
وان الامانه حملها ثقل الجبال الشامخات
وان الحمول الكايده تبرك لها زحول الحمال
وان العطا سترالخطاوالأولات الرابحات
خليت عشقي للوفا في درب عمري راس مال
لوكان ماحصلت من خلفه حصيل ولاغنات
لاهنت ياخنجر خوي الجنب كنت اصدق مثال
علمتني وشلون أخاف دروع جنبي بالمئات
وش عادأقول وصمتي ابلغ من تعابير المقال
ولاوش اكتم بين طيات الضلوع الناحلات
لاتقتلين الطهر من وجه البراءه ياالليال
وأنتي تشوفين اليتيم اللي دموعه حايرات
واللي بصدري له ثمان سنين عاش ولايزال
واللي بقى مابان يمكن يستره كم العبات
هنا كتبتك سالفة عاشق على صدر الرمال
وعجزت المك وانت يا جرحي على الصحراء شتات
والغايب اللي ماحداه الشوق لدروب الوصال
راح وترك غصة العبره وسود الذكريات
لاهبت الذكرى وساقت له قصيدي من شمال
لاينتظرني لاتباطى الريح من كل الجهات
ماهوقصورفي مكانة عشقهابنت الحلال
لكن مقاسيم النصيب ولا لنا عنها فوات
ودعتك الدمعه اليامن عانقت كحلك وسال
وإنا لي الله..لاخذل قطرالندى عودالنبات
((ياعلني لاطاح مقداري من عيون الرجال
من شان بنت..يعجل الله لي بساعات الممات)