ألا يالله ياللي تحـت هيبـة سلطنتـك أسلمـت = لك المسلم يسبح لك بحمـدك وإلـك الإسلامـي
أحمدك ؛ وأشكرك ؛ وأثني عليك بما علي أنعمت = وزدني في وفا بر العشير ووصـل الأرحامـي
ولهت الفجر ياليل الذهول اللي علـي أظلمـت = بعرضك واقع الذكرى عليه عـرض الأفلامـي
وولهتك يالنديم اللي على صافي وفاك أضرمـت = بصفحة ذكريات العام واللي مـن ورى العامـي
عطتني عزلة إخلاصي معك نسيان من نادمـت = كتبتك وإنطوت صحفي عليك وجفـت أقلامـي
بعد تقرير مشوار التجارب نجّحـك وأجزمـت = بأن السيف سيفي والعصـا والمحـزم حزامـي
أباهي ؛ لا أبالي ؛ وأتبيسـط كـل مـا قدمـت = أشـب النـار قـدام العـرب وأشيـد خيامـي
نهاري : حر شمسه ؛يستحي منها لسان الشمـت = وليلي ترجم نجومه ملامـة كـل مـن لامـي
على ضو الكلام اللي كشف عنّا ستار الصمـت = وعرفت إن به وجيهٍ باليمن ووجيـه بالشامـي
أحسب إنك تيمـم باتجاهـي ويـن مـا يممـت = أثر لا أنته ورايه بالطريـق ولا أنـت قدامـي
وكثر ماحن صدري للونيس وكثـر مادرهمـت = فجع صدري حنيني وأتعـب الأقـدام درهامـي
مصيبة لاتردّت قيمتك فـي عيـن مـن قيّمـت = يشوفك بالسهل وأنته تشوفـه بالسمـا السامـي
مادام إن جانبي شام لجنابك وأنت عنـي شمـت = كثر خيرك ؛ وأنا لانيـب لاجايـع ولا ضامـي
أشوف إنه علـي واجب؛إليـا مريتكـم سلّمـت = مرور كرام تربطها الكرامـه عنـد الأكرامـي
على شان الخفوق اللي على عرشه قعدت وقمت = وحجب عنك الدجا لين اشرقت لك بيض الأيامي
مصير الوقت يشرح لك ظروفه لاغفلت ونمـت = يصحّيك الزمان اللي يصحي كـل مـن نامـي
وتعرفني لمنها ضاعت أوهامـك بمـن وهمـت = وعرفت الفرق في حب الخشوم وحب الأقدامـي
ختام السالفة ياطيّب العشـرة كرمـت ودمـت = هذا حقك علي وحق شرهاتـي علـى أوهامـي
سعد بن جدلان