[نواف هلال]

غنيّت يا وقت الكسافه مواويل = تشرح ظروف اللّي يشوف البلاوي
حبيت أجرب هاجسي بالتعاليل = وأطرب مع أن الذيب بالقلب عاوي
تعبت يا وقت الشقا والتهاويل = في مجتمع ما عاد يرحم وياوي
مثلي مثل من ذاق جور الغرابيل = والناس حوله كن راسه خلاوي
يشدّ حيله لين ما عاد به حيل = جرحه خطير ولا لقاله مداوي
ينخى رجال ٍ بالملاقا حلاحيل = ليما لواه من الصعيبات لاوي
عزاه يا من ما غفت عينه الليل = يشكي ضماه ولا حواليه راوي
ساهر وعينه سا مرت نجمة سهيل = ولاهي ولاهو مثل لهو الهواوي
شارد مع سهيل ونسي قصة السيل = والسيل شاله تحت وقع المناوي
زرعه غدى من قبل يجني محاصيل = والطيب ضاع وضيّعه عند شاوي
صبره نفذ يومه طفح عنده الكيل = جامل وحاله صار حال الحياوي
الزبده إنه في زمان التهاويل = عمره قضاه وهو على العز ناوي
مثل الدلال اللّي بليّا فناجيل = ما غير تبرد عقب عز القهاوي
عزي لمن راحت حياته بهاديل = خاوى ,, بوقت ٍ فيه الإحساس خاوي
ولا خابت الهقوه بحصن الرجاجيل = وش عاد تنفع بالزمان الهقاوي