الشاعر الرائع والمتميز
نواف هلال
صح لسانك والحمدلله على السلامه
لقد غبت عنا طويلا والحمدلله ها نحن اليوم نراك بيننا
قصيده جزله من شاعر جزل
غنيّت يـا وقـت الكسافـه مواويـل
تشرح ظروف اللّي يشوف البـلاوي
حبيت أجـرب هاجسـي بالتعاليـل
وأطرب مع أن الذيب بالقلب عـاوي
تعبت يـا وقـت الشقـا والتهاويـل
في مجتمع ما عـاد يرحـم ويـاوي
مثلي مثل من ذاق جـور الغرابيـل
والناس حوله كـن راسـه خـلاوي
يشدّ حيله لين مـا عـاد بـه حيـل
جرحه خطيـر ولا لقالـه مـداوي
ينخـى رجـال ٍ بالملاقـا حلاحيـل
ليمـا لـواه مـن الصعيبـات لاوي
عزاه يا من ما غفـت عينـه الليـل
يشكـي ضمـاه ولا حواليـه راوي
ساهر وعينه سا مرت نجمة سهيـل
ولاهي ولاهو مثـل لهـو الهـواوي
شارد مع سهيل ونسي قصة السيـل
والسيل شاله تحـت وقـع المنـاوي
زرعه غدى من قبل يجني محاصيـل
والطيب ضاع وضيّعه عنـد شـاوي
صبره نفذ يومه طفـح عنـده الكيـل
جامل وحاله صار حـال الحيـاوي
الزبده إنـه فـي زمـان التهاويـل
عمره قضاه وهو على العـز نـاوي
مثـل الـدلال اللّـي بليّـا فناجيـل
ما غير تبرد عقـب عـز القهـاوي
عزي لمن راحـت حياتـه بهاديـل
خاوى ,, بوقت ٍ فيه الإحساس خاوي
ولا خابت الهقوه بحصن الرجاجيـل
وش عاد تنفـع بالزمـان الهقـاوي
شاعرنا الرائع والمتميز
تقبل تحياتي وتقديري
ولاتحرمنا من جديدك وسماع صوتك