يا زمن وش باقي عنـدك مخفـى؟
ليش تعلن حرب وتوجـه قذايـف؟
ما كفاك تقـدم الضيـم المصفـى؟
ولا كفاك العيش في ظلم وكسايف ؟
وش بقا لي من بعد حـب توفـى؟
ما على الدنيا عقب موته حسايـف
كنت اخاف البعد لين البعـد لفـى
وبعدها : ماني من الايام خايـف..
يا زمن بالهون ما سويـت كفـى
ماصبرت ايليـن فرقـت الولايـف
اشهد انه بالرهـن كفـى ووفـى
واشهد اني رحت خسران وعايـف
اسحب اذيـال الهزيمـة ويتشفـى
وذقت مر الغبن من كاس الكلايـف
آه ياوقـت مضـا ياليـت غـفـا
ليت ما وقته مـع الايـام طايـف
لـذة الدنيـا ثوانـي مـا تكفـى
وردة هبت بهـا ريـاح عصايـف
ولمعة شهاب سطع لحظـة وطفـا
وانطوت عني مثل طـي القطايـف
والامانـي زرعهـا قـوس وجفـا
لافهـا مـن لايـف الايـام لايـف
ول ياوقتك ليـا اعطـاك المقفـى
عقب ركب الكور تنـزل للسفايـف
تلتفت عن بعض شانـك واتخفـى
وتترك حقوقك لغيرك ..وانت شايف
والسيوف اللي بها الكيل الموفـى:
اصبحت عصيان ..ورماحي سنايف
الرآئع / خلف الغريب
..
