اليوم انا كني من الوقت مرجوج = سودالليالي عكرت لي مزاجي
اسهر طوال الليل والقلب ممروج = ازريت اعيش فـ دنيتي باندماجي
امشي وحالي نقطع دروب وفجوج = مثل المريض اللي يبي له علاجي
مليت من دنيا صواديفها عوج = ومليت من حال ٍ به الهم لاجي
مابي من الدنيا سواليف وهروج = ماعاد ابي منها ياكود الخراجي
يكفي لقلبي فوج هما ً ورى فوج = ويكفي حياة ٍ عشتها في عجاجي
ويكفي لحال ٍ بين الاحزان مدروج = يذوق طعم الوقت مر وهماجي
ياوقتنا اللي بالبهاذيل ممزوج = دايم وشرك يبتلينا ويفاجي
لادامك الله تصطفق كنك الموج = لاهبت الريح العتيه وهاجي
يالله ياللي بادي الخلق من زوج = يامحول ٍ ضيق الدهر لانفراجي
اهدم بروج الشر وارفع لي بروج = واجعل كتابك في حياتي سراجي
حتى تحول نار الاقدار لثلوج = وآخذ من الدنيا واسد احتياجي
واعيش مرتاح ٍ ادوج البلد دوج = اسلي الخاطر وافل الحجاجي
الشاعر عبد العزيز القثامي
صح لسانك
رائعه هذه القصيده
أنتمنى ان تواصل هذا الابداع
تقبل تحياتي