ياصاحبي ليش تتركني وتنساني؟؟؟
وانت تعرف داخلي وش كبر مقدارك
مجنون حبك ولا اعشق غيرك إنساني
ومن بد كل البشر في حبي اختارك
الشوق ياصاحبي والحب سلطاني
من زود حبك اسج الرجل لديارك
ماتدري ان الغلا والشوق عناني
تصعب علي شوفتك مير اسمع اخبارك
اجزيك بالوصل وانت الهجر تجزاني
واهديك ورد الغلا وتزف لي نارك
ليش اتجرى على هجري وحرماني
دامي معك وافي ومابحت باسرارك
وعطيتك اللي تبي ياسيد خلاني
واصبحتلك خاتم بيمناك وايسارك
ياما تعنيت لك والشوق وداني
واصبحت وامسيت في حبك وتذكارك
ترى الغلا والوفى والطيب عنواني
وانت الغدر والخيانة صاير شعارك
قدمت لي حجتك من غير برهاني
وفاجأتني بالفراق ورحت بإصرارك
خلاص ياصاحبي مانلتقي ثاني
خلك مكانك وماك العذب بأنهارك