للاضافه فقط ...
ولما سمع ابن رشيد بالقصيده وبكرم دغيم قال لازم ازوره واشوف هو صحيح
انه مايصب الا الوالمه البكر وانه يشب لساعه متأخره من الليل
وقال للي بالمجلس قومو كلكم نبي ناصل دغيم ونشوف
ودخلو عليه وهو نائم بعد منتصف الليل واذا به يحييهم ويسارع للمشب
واخذ الدله وصب له منها واذا بها بكر وقال عزالله انك مثل ماسمعت
وطول ما انا عايش وماد الله لي كل معاميلك علي يا دغيم وتستاهل
فأنشد دغيم الظلماوي هذه الابيات ارتجاليه في حضور ابن رشيد
مده رهن لـولاك ماقلـت ياكليـب
ولا قلت شب النار وصر موقد(ن)له
يابو الارامل والعذارى ومن عيـب
وابو من صار العصـا ثالـث لـه
ويابو المحرول والعمى والمحاديب
ومن ضامته بقعا تصير ولد(ن)لـه
يالجوهر الناريس يالمسك يالطيـب
ياعنبـر مـن جـربـه مايمـلـه
تقفـي محاليـب وتملـى محاليـب
وكبـد تيبسـهـا وكـبـد تبـلـه
ماتستحي لا يا قليل العذاريـب
لو تستحي ماتجمـع الطيـب كلـه
وان كان هرجي به عليكم عذاريـب
سامح عسى الي عقبك بالـف حلـه