يابشر تكفون حلوا عن سمايه
مايصيب الهرج لو الهرج صوبي
كم سكت إلكم بما فيه الكفايه
إشتموني لو زعلتم وإشمتوبي
عيبوني واتركوني في عمايه
واتركولي واحد يرضى عيوبي
اتركولي واحد يمسح شقايه
كل ماحط الزمن دوبه ودوبي
ذاك والله لاذكرت إنه ورايه
أشعر إن الكون كله وسط ثوبي
يكفي إنه لو يسولف للمرايه
كن صوته يهمس إلصورته ذوبي
كيف أنا بذوب دامه معايه
أسمعه وأسهر معه لاول ذنوبي
كل ماقال السهر درب الغوايه
قلت كله من عيونك هبلوبي
وكل ماقال الخطا ماهو خطايه
قلت له قل العيون السود توبي
ضيعتني وأسأل الله الهدايه
وين أجيب العقل أجيبه من جيوبي
من يعرفك مايدل للعقل رايه
ياشروق العمر مدري ياغروبي
أذكر إنك كنت لي مثل الهوايه
لو تروح ولو تجي يبقى شحوبي
بس مدري كيف صرت اليوم غايه
وصرت أجي وأروح مدري عن دروبي
يابعد عمر الكتابه والقرايه
يا الشمالي يا بو الملح الجنوبي
لاقريت اللي كتبته يارجايه
رح وبلغ ربعي اللي جننوبي
قلهم يمكن يخلون الوشايه
وإن تمادو خلهم مهما حكوا بي
أنت خلك بس في الدنيا عزايه
لاتفكر في العواذل وانت صوبي
أدري إنه كل درب وله نهايه
بس أنا باقي معك لاخدروبي
للشاعر المبدع
فهد المساعد