خانتني الهقوه على شرهة الناس=وضاعت اعلومي في يدين الهبوبي
ماهي على قل الرفاقه والاوناس=ولاهي اشموس تتجه للغروبي
ولاهي معاني شالها صدر قرطاس= ولاهي اشجون اللي بوقته طروبي
يقولها اللي لازفر كنّ الأنفاس=بركان ينفث لآهبه من اجنوبي
ماقلت قلبي لاشكى الجرح حسّاس=لاشك شعري بالمواجع يـــــــنوبي
قــــــلت أتحيزم بالمشاريه لاباس=مخطي وانا ادرى واحد في عيوبي
الـــــقلب كم له بالمتاهات محتاس=برقه شمال ورايــــــــحٍ للجنوبي
يمكن خسرت بغلطة الطيب نوماس=ويمكن ربحت اللي تشيله اجيوبي
الـــــــــلي عرفته يعطي النفس مقياس= واللي جهلته حدّر اللوم صوبي
لو في يدي عن ظلمة الليل مجباس=ماكان طالت عثرتي في دروبي
واللي نــــــــشدني والمعاليق يبّاس=لاعاد ينشد خافقي لو يذوبي
ماهو خطاءلويجرح القلب هوجاس=لاباس دامه بالظلوع امحجوبي
ياعــــــــــــنك لوكل المفاهيم تنداس=ماشفت مثلي في خطاه امحسوبي
واليوم لوقلت السفرصابه اعماس= اصبحت يادرب الهقاوي كذوبي
كم رجعتني صرخة الياس للياس =كـــــم عاندتني توبتي في اذنوبي
يازين عذري لابدى الشيب بالراس =لاصار عذري شايب مايتوبي
لاصرت من قل الحطب حاطب الفاس= وش عاد اسوي يستر الجرح ثوبي
يـــــــــشره علي اللي جهل شرهة الناس= كم فات لي ...وانا على الدرب دوبي