ياعليم الغيب واسرار الأمور الكايداتي = تعلم اللي في بطون الأرض واللي في ظهرها
يامغيث (ن) جرهيدات الفجوج اليابساتي = من مداهيم المزون وتخضر ويورق ثمرها
يامدير الكون كله من جميع الواجهاتي =وتحكم اللي بالسماء والأرض واللي في بحرها
ياجليل الملك يامحيي العظام البايداتي = تبعث الأرواح فيها قدرتك محدن قدرها
اسمك البادي قبل لأبداء البيوت النايفاتي = من هواجيس (ن) على مايقرب نظرها
لستوى المعنى وجاله عند سماعه طراتي = لعنبو فكر(ن) جزيلات المعاني ماصخرها
مانجيب الا اللي تشرف بوقت الموجباتي = من هواجيس (ن) جليل الملك لأفكاري ومرها
في محل عيال نومس كاسبين الطايلاتي = ياهلا ويامرحبا في عزوتي واللي حضرها
واثني الترحيب باللي يلحقون الجاذياتي = الرجال اللي فخرنا يشهد الله من فخرها
عزوتي جعافره يوم العصور الماضياتي = نالوا الأمجاد والتاريخ من قبلي ذكرها
والله ان افعالها يوم الفعايل نادراتي = الرجال اللي مع الأجناب نومسني سطرها
اليا انتخو يوم اللقاء يروون حد المرهفاتي = دون تلعات الرقاب اللي محاسيك(ن) وبرها
وبالبلاجيك القصيره يحتمون التالياتي = في زمان اهل المراجل والمقاريد وقشرها
وفزعة المظيوم لا ضاقت عليه الواسعاتي = مثل مذخور الذخيره باللقاء للي ذخرها
وبالكرم والجود تعرف بالسنين القاسياتي =وجارهم لو طالت الجيره على الجيره شكرها
ومدح ربعي مايذم اهل العلوم الوافياتي = والرجال الطيبه محد(ن) يشكك في خبرها
وعد وبل الغيث واعداد النجوم السامراتي = تمت وصلوا على طه النبي صفوة بشرها