اعتذر على نبش هذا النص من ملفات الأرشيف ..
زملتني بالهموم و قلطتني للعذاب=و انسجت خيط المتاهه مثل خيط العنكبوت
جيتها ضامي تعنّا و ارتجي رحمة سحاب=و قفلت باب السعاده وحرمتني كل قوت
جيتها واثق و ابفتح للسعاده كل باب=لكن الهقوه تهاوت كنها حبات توت
قالو ان العشق بلوى و اكبر احلامه سراب=واقوى عشاقه يهلوس ما عرف درب السكوت
ايه ثوّرت الغلا و اغليتها فاقد صواب =يكفي ان بعادها جرح و ألم و دروب موت
جيتها وابيات شعري راس مالي والزهاب=حتى حظي ماسترته بالمحايل والبشوت
اجمع الجرأه و عيني بين رعشه و اضطراب=كيف هذي ضد هذي ما اتوقعها تفوت
فاهمه وش مقصدي و القصد ما يبغى كتاب=الملامح و انتقال الصوت من صوت ٍ لصوت
والقهر كل ما حكيت بهيبة و هدت عقاب=قالت ابرز ما حصل له عشقه الطاغي لنوت
دامها اتعرف المحبه ليه ما تعطي جواب=نرفزتني بالإجابه نرفزت لاعب بالوت
غيروها و المشاعر مالها عندي نصاب=السؤال.. ليا متى يفرح بنا القلب الشموت؟
كل ما قلته لها تقطع سؤالي بالعتاب=همسها رمز التحدي واحتقار لكل صوت
ربما أصابني خوف ٍو شوق ٍ و ارتياب=أو مايسمى بالذهولِ أو بغفواتي غفوت
الوكاد ارجع لدوامة همومي والعذاب=و تبدا بنسج خيوطها متشبهه بالعنكبوت