[المسيكي]

يا رجم ِ ياللّي شامخ ٍ في معالِيك=عيّنْت خلّ ٍ دايم الـدوم ِ يوفـي
وين الحبيب اللّي ظلاله تباريـك=اللي يجيلـك ينتظـر بالوقوفـي
ياما تمشّى بين حزمك وواديـك=وياما توطّا فوق ِذيـك العدوفـي
يارجم قلّي وين خـل ٍ مخاويـك=اللي يجيلك في محلـك يطوفـي
نوب اشوفه في ظلالـه يغطّيـك=أبـو جديـل ٍضافـي ٍ للردوفـي
وأحيان نور ٍ زايد ٍ فيـه يعميـك=حتى تقول الشمس صابه كسوفي
جمعتنا يارجم مـن دون تشكيـك=مار الزمن والوقت غيّر ظروفـي
وهذي هي الايام لابـدّ ِ تجزيـك=مع الليالي تقتلـب فـي جنوفـي
لفيتك أنا ولاظن خلّـي يناجيـك=ولاظنّتي يا رجمنا لـه نشوفـي
وش عاد لو هو دايم ٍ في محاريك=أمر الولي امقـدّر ٍلـه يحوفـي
اقفى لربّه طاهـر ٍ راح مايجيـك=عساه بجنـان ونعيـم ٍ يروفـي
نشدتك انا يارجم وهالحين أنبيك=خبرتك أنا واطلعت كل الحروفـي
وبالله خلّـك لاتقـدّم تعـازيـك=يكفي دموعي زايده في ذروفـي
خلّي توفى وعمرها بيـد باريـك=هذي مقادير الزمن والصدوفـي
ماباقيـن ياغيـر ناتـي نسليـك=واذكر خياله بين نـور وطيوفـي
ومن عقبها يارجمنا لو نحاكيـك=ماعاد ندلـه بالهنـا والشفوفـي
خلّيتنـي يازيـن وأنـا اراجيـك=خلّيتني في دنيتـي وزاد خوفـي
ومزن ٍ لمحته فوق قبرك يشاديك=جعله يهلّ وبرقها لـه رفوفـي
على ثراك وكلّ ماهـلّ يسقيـك=يخضر بجاله من جميع الصنوفي
وحلفت أنا مانساك ولاني بناسيك=حتى تروح الروح وللحق نوفـي

فهد المسيكي