**
بيتٍ كتبني.. كـل ماجيـت أبقـراه..=يضيع فكري .. بين عجزه وصـدره..
سهلـه تراكيبـه.. ربيعيـه أجـواه..=الغيم فوقه.. والفضا الرحب حَـدره..
أقسى على الأحساس من سطوة الآه..=وألذ .. من عطر اللقا .. " تحت بَدره "
الشِعر يذعن له .. والأرواح تظماه ..=الله رفـع عنـدي مكانـه و قـدره..
بيـتٍ سكنـي ! وأستشفيـت معـنـاه=مااحدٍ وصل سقفه .. ولاهز .. جدره
**
ياصاحبـي " ترى " النوايـا سليـمـه=ماني على تغليف الاحساس معتـاد !
انا الياحـسـت للهرج قيـمـه=أبدأ وأصرح به على رؤس الأشهاد
ليه الصراحه في زمنّا " جريمـه"؟!=ليه المسافه كلها .. كـذب وعنـاد؟!
ليه الشعور المضطرب والظليمـه؟=ياهل ترى ماعاد " لرواحنا " اجساد؟!
**
راسي كبير .. وكل الأشياء صغيره=لأجل كذا .. ماكبّر الشِعر راسـي
يكبر وأشوف أن الأمانـي كبيـره=والأرض صاله والجبال الكراسـي