السلام عليكم ورحمة الله وبركاته
مسّاكم الله بالرضا والمسرّات أعضاء هذا الصرح الشامخ
أتمنى أن ترقى لذائقتكم الشعريه ولكل من مرّ من هنا :
لولا الحيا ومسابق الطيب والجود=ماشفتني ياصاح صدري شمالي
ولولا إن بعض الهرج ياتيك منقود=لقيت صمتي للملا راس مالي
وإن جات زله من هديفه ومقرود=ماحركت شعره ولاضاق بالي
أنا رجل واثق ولاأعتاز لشهود=حتى تزكيني على قدر حالي
ونا الذي لاجات للنعم والزود=خذيتها لو كلفتني حلالي
ربيت فالدنيا ونا رفعتي عود=متنومسن بإسمه على أول وتالي
أصبر وصبري لو على شمخ الذود=تبرك ونا متني جبل فوق عالي
ولو الليالي في عيوني غدن سود=أصبر على الدنيا و جور الليالي
وإن عادت الفزعه مع قروم وسنود=حولي بني عمي وحولي خوالي
كل رجل بالدنيا له خطوط وحدود=حتى لو إنه كان بالعين غالي
خطوا رجل يمزح على غير مقصود=يجيب له منقود لو كان خالي
وعمر التكبر مارفع آدمي زود=الكبر لله والبقى ياحلالي
بكره تموت وياكل بجسمك الدود=ماهو بنافعك الكبر والتعالي
العقل نعمه والجهل ماجلب فود=مار إن بعض الخلق ماهو مبالي
كنز القناعه فالرجاجيل موجود=والحمد لله دام صدري شمالي