تَعَبت أشيـل الهَم عنّك وأداريك
________ وإنتَ همومي ثقلَهَا .. ما يهمّك !
لا ياحبيبي ، هالزمن لا يخليك
________ تقسى على قلبي وتسقيه سِمّك !
[ دِنْيـَاكْ ] هذي , لا تغيِّر مباديك
________ مهما إستِطَعت الظُلم خلْني أضمّك !
ماهي غريبه من يذمِّك يماشيك
________ لكن غريبه يمدحِك من يذمّك !!
ما كل واحد غاب معناه ناسيك
________ بعض البشر ينساك لو كان يمّك !
أدري تعِزْني .. اللـه يعِزْ : غاليك
________ وإن كان لي عندك معزَّه بـ أشمّك !
في خاطري كم كلمةٍ عن تجافيك
________ ولا شفت دمعاتي إنزَلَت حط كمّك !
إسمك حبيبي ويا كثِرها أساميك
________ وقلبي يفز ، إن شاف حزنك وغمّك !
ليتك تحس في ضيقتي يوم أحاتيك
________ أحرق لك أعصابي .. وما حَس دمّك !
غايب بدون أعذار .. ربِّي يجازيك
________ عطني سبب مُقنع حبيبي .. وألمّك !
همِّك , جنونك , ضحكتك , كل ما فيك
________ صوتك , سكوتك , وأرجَع أقول : ( هـ مّ كْ ) !
[ لبيــه ] منِّك ، غيييير .. لمَّا أناديك
________ كنْ | الكلام العَذب | ... مرساه فمّك !
أبوك , خالك , إختك , أخوك , ماضيك
________ ربعِك ، جميع النـاس, وعيال عمّك !
شايف غلاهم ؟ والله أكثر ، أنا أغليك
________ واللِّي وِصَل ( نِص الغلا ) يمكن أمّك !