( يا عين شحّي )
ياعين شحّي لا تجودين يا عين=دام الحزن بالقلب لا تظهرينه
لا تجعليني بنظرة الناس مسكين=ولا تجعليني دون عزه متينه
حبست دمعي مثل حبس المساجين=وعجز حسودي يفك قيد السجينه
اكبر بلا لا صار حولك ملاعين=اللي شعوره لك حقد وضغينه
ما في امر من مر شمت المعادين=ولا في اعز من ليث داخل عرينه
صبرت لين الصبر فاق الموازين=كم ضيقة بالصدر صارت دفينه
قدرت انا اكتم صدمة الهم والبين=لكن عجزت اكتم مرار الغبينه
ما يقبل الغبات كود الرديين=والا انا من قوم محد يهينه
ربعي هل الطولات مثل السلاطين=اللي تغيث الناس مدت يمينه
وانا ولد شلال مروي المسانين=اصغر طموحي فاق حكم المدينه
(يما حياة اتسر كل المحبين=والا ممات يغيظ ناس لعينه)
يالله يا رازق جميع المساكين=يا واحد كل البشر مرتجينه
ابعد دروبي عن غثا النقص والشين=واجعل لنا ببحور فضلك سفينه
واغفر ذنوبي ياالاه المصلين=ولا غير فضلك ياالاهي رجينه
للشاعر والكاتب المبدع /
عبدالكريم الشمري