جعلت لك من زين الايام زينه ..
و اديت واجب صحبتي لك على اصول !
و دفنت حبّك بالضلوع الدفينه ..
و ورّدتني جمّة مهابيل و خبول !
كم قلتلك قلبي يحالي حنينه ..
حنين هرش بلاهب القيض معقول !
و كم جيت ساري خلف سور المدينه ..
و من حر جوعي لك ليا شفتك اقول !
الجوع شين و خوّة الجوع شينه ..
ودّك تخاوي نعمة الله على طول !
جيتك و انا معدوم ثقل و سكينه ..
مدري وش اباقول ولا وش اطول !
لين الجفا تصفح يمينك يمينه ..
و ارخصتني وانا محيّر و مذهول !
و اقفيت وافراقك عقد حاجبينه ..
و ابي حلولك مير ما عندك حلول !
و سمعت ساعة اقفيت دقّه حزينه ..
و حطيت دون الدمع بيبان و قفول !
اخاف من قول البشر كيف عينه ..
سالت مدامعها علشان مجمول !
و ثبت الخافق يبيّح كنينه ..
بيني و بين الذات ما حولي الزول !
و قعدت افكر في ضنين و ضنينه ..
وش تالي المعقول و الغير معقول !
دقّيت ابين ما حوته الخزينه ..
لكن تيلفونك على طول مشغول !
ودّي ابين لك رساله ثمينه ..
ولا لك الا هي وانا ترثة زحول !
يموت ذيب القوم قهر و غبينه ..
اخير من موته على شان مجمول !