ياليت ما بالقلب ياخوك ينذاع=وترتاح نفس(ن) زاد والله جهدها
مير البلاء أكتم ورى عوج الاضلاع=هم(ن) أسر نفسي وزود لهدها
هم(ن) ولو انه على جاهد القاع=زلزل مبانيها وكسر عمدها
كله سبب طفله غدت كلها اوجاع=ضغط وتليف كبد والخافي أدها
طفله بريئه منهكه عمرها ضاع=رحلة شقاء عانت بها من مهدها
ليت الهناء ياخوك يشرى وينباع=لآخذ من سنيني واحطه بيدها
لاشفتها ضاقت علي كل الابقاع=يطري علي وش عقب امر وأدها
لافي يدي حيلة ولاعندي اسناع=تمسي وتصبح يالخوي في نكدها
لاشك ما للعبد ياكود ينصاع=لامر الذي بيده عناها وسعدها
ربك كريم وعارف(ن) كل الاوضاع=بأمره شفا عين الضرير ورمدها
رحمك الله يا ( أسيل ) وأنا على فراقك لمحزونون
الناس تؤمن بالولي بكل الاوضاع=عند المصاب وعند راهي رغدها
وحنا خذينا وقتنا اثلاث وارباع=ذقنا مرارتها وذقنا شهدها
هي سنه الدنيا ملاقاه و أوداع=ناس(ن) تموت وناس تاتي بعدها