ما باقي الا الشوق خلوني اشتاق = لأيام حلوه ولمشاعر حميمة
وقتا به اجمل عشق وهيام وعناق = لقلوب ما فيها نوايا اثيمه
تزورني ويفارق النوم الاحداق = واسهر على ارث الغرام ونعيمه
على البيوت اللي لها الطرف رماق = وصارت عقب هاك الليالي عديمه
اللي عليها سجت الروح والساق = روحي تسابق خطوتي بالهميمة
ذكرت هند اللي لها القلب تواق = بنتا بقت بين الحنايا مقيمة
مرت سنين وهي نزيلة بالاعماق = عيا البطا يقشع لها طنب خيمه
مع خدها اللي لا كشف ضو براق = يلمع حدر سودا وساعا مظيمة
مفرق شعرها وسطه المسك عباق = ايو الله اني همت به واستهيمه
لها بدرب الحب شرهات واخلاق = ولاهي على مبدا العقول السقيمة
من بيت حصنا به مشاهير وعتاق = اللي بهم عز ومعزة وشيمة
تاريخهم وثق على كل ميثاق = وسط الصدور الطاهرات السليمة
بنت اجوديا للخطاطير سباق = من كثر ضيفانه تشامت حريمه
يبن لهن فله وخادم وسواق = وهو يقول الخير ربي يديمه
المال ياحاشه سريعا بالانفاق = للضيف والا للعيال اليتيمه
ويوم الزمن قصر عليهم بالارزاق = تعففوا والعز بالنفس سيمه
ماهوولد عفنا على المال طباق = يفرح ليا شاف القرا والعزيمه
ويوم الليالي ماسعت لي بالا وفاق = وصار الفراق وكل نفسا كظيمه
راحت كما نجمه تعلت بالافاق = راحت مراح الماجدة والكريمة
كم لك بقلبي من عبارات الاشواق = وكم لك بقلبي من محبة عظيمة
سقى وطنها من مناشيه صداق = يسوقه الرحمن من نوا غيمه
راح الهوى والحب راعيه ما فاق = يعيش في سكرة مفارق نديمه
حافظ لها ذكرى قصاصات واوراق = وعطرا ..تلاشى ..من ..قزازة ..قديمه