أولاَ : أحب أشكر كل من تفاعل وشارك وتواجد معنا في الجزء الأول ..
اليوم ان شاء الله راح نتناول عاده من هالعادات السائدة في مجتمعنا ألا وهي .
7
7
7
( الســـكـــــــــــــــــــــن )
بيوت الطين لا شفته تذكرني زمان ( ن ) * * * زمان ( ن) رغم ما به من قســاوة ماحد سبـــــه
وهذا بيتنا واطــلاله اللي عـــودت تذكــار * * * وذاك الـــروشن وهـــذا مكـــان الــزير والقبـــه
وصفـة جدتـــي ما باقـي الا بــابها واجــدار * * * وصـــوت الباب يصفر كلما هب الهـــوى هبــه
وهذا ما بقى من صفــة امي والغمــي منهار * * * غماها من جذوع الا ثل واحلى من غمى الصبه
وهذا كان مطبخنــا وهــذا هــو مشب النــار * * * قبل لا نعــرف الغـــاز وقبــل لا تطلــع الدبــــه
وهـذا هــو مجببنــا وهذاك الكمــر ووجـــار * * * وذيك الدكـه القصيا وهذا الحــــوش نلعب بـــه
سقى الله ذيك الايـام الخوالــي ليتهـــا تنــدار * * * سقى الله لا تجمعنـــا وصـــارت عندنا الشبـــه
سقى الله يوم تبرق ثم ترعد والسمــا مطـــار * * * وصوت المثعب يسورب وكنــك جــالس بجنبـــه
وجتنا الجـدة تسبحن علينا يــوم هنا اصغـــار * * * على شمعة سراج القـاز قبل لا نعـــرف اللمبة
زمن به للطفولة في خيالـــي ذكريات اكثـــار * * * يــاليتـــه ترجع الايـــام لـــوقت راح واحبــــه
ولكن ما مضى هيهات يرجـع والــزمن داور * * * يـروح الــوقت مع ناسه ويبقــي ربي وربــــه
منول ياطولين البقاء والسلامة كانوا أبوانا وأجدادنا عايشين في بيتات طين او ابيوت الشعر وكان مهنا أزين من عيشتهم هدوء وراحة
بال صحيح أنهم عانوا كثير من الفقر وقلة الحيلة بس كانوا على الأقل قلوبهم على بعض والنفوس والخواطر صافيه ما تشيل على بعض ..
كانوا منول يعيش في بيت هالطين الأم والابو والبنات والعيال وحريمهم وكانوا طبعاَ متفاهمين ومافيه احد يقدر يبدي
رايه أو يقول كلمة دام الابو وألام عايشين الكلمة الأولى والاخيره للابو طبعاَ والكلام اللي يقوله يمشي على العيال
والبنات وحريم العيال والكل يقول سم وآمر ولبيه والشور شورك يايبه ( والله اللي مهوب عيال الحين ) , طبعاَ العيال اذا
كانوا متزوجين لازم يسكنون مع أهلهم ما فيه أمل يطلعون في بيت مستقل دام الأم والابو حيين ,
والبيت انتم خابرين
مافيه الا مجبب وكم صفه وروشن وحمام ( الله يعزكم ) للعائلة كلها
( << عاد الحمام يصب في حوض النخلة )
ويعيشون العيال كلهم في هالبيت مع بعض والروشن هو غرفة الأم والابو وإذا كانت مهيب للام تكون للولد
الكبير وحرمته
( هالغرفة سبشل محد يسكن فيها إلا الكباريه هههههه )أما من ناحية الشغل في البيت
فالبيت ما يقوم به ألا البنات وحريم العيال وما فيه وحده تقدر تقول اليوم دور فلانة وإلا مالي شغل مهوب ذا شغلي كلهم
يشتغلون , وطبعاَ شغلهم كان كله كرف في كرف مساكين مثل حلب الغنم والبقر وخض اللبن وجرش الجريش وطحن
الطحين ويسوون الغداء والعشاء ويغسلون الثياب ويخيطونها ... الخ هذا غير إذا كانوا فلاليح فكانت الحرمة تروح مع
رجلها لم المزرعة تعاونه على الحصد والحش وعلى الحلب
وهذا كله مع الحمال والولادة وتربية العيال
(صدق أن حريم منول حريم مو مثل الحين <<< ياويله من معشر النساء )
وطبعاَ مع كل هالشغل والأعمال اللي يقومون فيها يكون بيتهم مثلاَ البيت الكبير ويصير عاد الله لا يوريكم داخل وطالع
اللي يزور عمته واللي يزور خالته وما شاء الله عليهم بيتهم مفتوح للضيف في الليل والنهار ما عندهم كلمه إلا يا هلا ويا
مرحبا ويالله حييهم ( بلا هم ما عاشوا في هالزمن الاقشر كان يحددون أيام معينه لزيارة )
طبعاَ انتم عارفين الرجال يطلع هو وعياله من الفجر ولا يرجع إلا إذا غابت الشمس وإذا رجعوا يلقون أمهم وحريمهم
مجهزين العشاء يتعشون مع بعض ويتعللون ويسولفون مع بعض ومافيه وحده تمسك رجلها وتقول مرة أخوك سوت وإلا
أمك قالت وإلا أختك حطت ما شاء الله عليهم قلوبهم صافيه ونقيه ما يفسرون الكلام ويئولونه الميتة لون وشكل مثل
الحين ..
المهم يالربع فيه بعض أمهات الزوج الله يهديهم يصيرون قشران ونفسهم شينه ومع ذالك يستحملونها حريم عيالها حريم
أول السنعات اللي كل شي يتحملونه ,لانهم عادينها مثل أمهم ويحشمونها ويسمعون كلامها وحتى لو عصبت عليهم
يقولون سمي وابشري , ومهما صارت مرة الولد متضايقة من العيشة في بيت أهل زوجها بس ما تقدر تقول أمك سوت
وإلا قالت ولا تقدر تقول حط لي بيت الحالي لأنها عارفه إن وراها رجال بيغسل شراعها وبيقول لها دام أمي وأبوي
عايشين مالك كلمة في هالبيت واسكتي ومالك الا مكان رجليك ( الله مستعان وين رجال منول الحين انقرضوا إلا من رحم ربي )
وهذي كلها حياة منول ما فيها غير البساطة وسعه الصدر ..
أما الحين الله لا يوريكم كبرت المنازل والمساكن وضاقت النفوس يا دافع البلاء , اصغر صالة في بيوت الحين هي اكبر
من بيوت الطين حقت منول ومع ذالك وش كثر تهاوشهم وصجتهم وما فيه احد يستحمل الثاني ..
عاد الحين يالربع إذا بغا يتزوج الولد طبعاَ ما فيه أمل يسكن مع أهله إلا القلة القليلة منهم عكس منول , حتى إذا سكن
مع أهله يعزلون له جناح كامل أو شقه ومع هذا يصير فيه مشاكل لان مافيه الحين احد يستحمل احد لا مرة الولد
بتستحمل أهل زوجها ولا أهل الزوج بيتحملون مرة ولدهم وطبعا َ من يتزوج الولد تقوم حرب (ولا حرب البسوس هههههه ) بين أهل الزوج ومرة ولدهم , هم يقولون مرة فلان قالت وهي تقول أم زوجي وأخواته حطوا وقالوا وسوو
طبعاَ هذا كله لان أهل الزوج ما عدو مرة ولدهم مثل بنتهم ومرة الولد نفس الشي ما تعدهم أهل ثانين لها تحسم أعداء
اللهم يكافي ( وهذا كله راجع إلى صغر العقل بين الطرفين ) ..
عاد والله يا أخوان ويا أخوات فيه بعض أمهات الزوج وبعض حريم العيال ينشربون مع المويه العكرة من حبابتهم
وطيبهم بس مساكين بعض أمهات الزوج يحضضها ربي في حريم عيال ستلاب اعذروني في هالتعبير بس هذا انسب شي
يطلق على مرة الولد اللي ما تحشم أهل زوجها , عاد مسكينه أم الزوج هي اللي رايحه فيها إذا صار عندها حريم عيال
واجد واجتمعو عندها وقالت الوحدة من حريم هالعيال جيبي وأنا أمك بياله والا فنجال الله لا يهينك
( <<< والله أنها ذربه أم هالرجل بس من يقدر ) تقوم وهي نفسها في راس خشمها وتجيب البياله وإذا صارت عاد قليلة أدب ردت
عليها في حزتها وقالت ورى ما تأمرين فلانه وفلانه اللي هم حريم عيالها الثانين وإلا بناتك ( << يتناحرون عشان بياله ) , اما عاد السنعه منهم تسكت لين تروح للبيت وتسوي نون وما يعلمون وتبداء تحشا في زوجها أمك سوت كذا
وقالت كذا وليش تأمرني ولا تأمر فلانه
( عاد الله من تحريف الحقائق ) تزيد على اللي صار وتخلي نفسها مظلومة ,
عاد تعالوا شوفوا الرجال من بكره إذا جاء لم أمه وأخواته وراكم تقولون لفلانه كذا وليش تحطون كذا طبعاَ الحقائق اللي
بتجي ضدها ما نقلتها له واللي نقلتها نقلتها بتحريف
(<<< إن كيدكن عظيم ) وطبعاَ ارجع وأقول ما عاد فيه
رجال مثل منول إلا من رحم ربي , وإلا لو هو سنع كان إذا جت حرمته تحش في أهله قال لها اسكتي ولا يكثر وهذولا
أهلي ولا تقولين فيهم شي , بس بعض العيال الله يهديهم يصير صغير عقل ويسمع كلام الحريم وتصير مشاكل مالها أول
ولا أخر ..
طبعاَ أنا ما أحط اللوم كله على مرة الولد فيه بعض حريم العيال ما شاء الله عليهم يعدون أم الزوج أم ثانيه لهم وتصير
هي وأهل زوجها مثل السمن على العسل بس في هالزمن قليل تحصل الحبيبه اللي تعد أهل الزوج أهلها ..
في الختام يا أخوان ويا أخوات , هالكلام اللي قلت ما ينطبق على الكل ..
عاد العذر والسموحه من الله ثم منكم لو قصرنا في شي أو نسينا شي بس مثل ما تخبرون الموضوع متشعب أكثر من الأول
منقول للفائدة